Aningaasaqarnikkut atasinnaasumut

Naalakkersuisoqarfinni Europa-Kommissionimilu atorfilittat ulluni 7. – 9. december kinguneqarluartumik ataatsimeeqatigiipput. Suliniutit ukiunut arlalinnut 2021 –miit 2027-imut 225 mio. Euro-t missaannik naleqartut aningaasaliinissaq ataatsimiissutigineqarpoq. Suliniut Multiannual Indicative Programme-imik taaguuteqarpoq, nunatta ilinniartitaanikkut, avatangiisitigut aamma nukissiornikkut pitsaasumik ineriartorneratigut nunatsinni inuiaqatigiit ataavartussamik aningaasaqarnikkut periarfissaat annertusarnissaanik siunertaqarluni. Bruxelles-imi ataatsimiinneq ingerlanneqarpoq.

Mininnguaq Kleist-ip, Nunanut Allanut, Inuussutissarsiornermut Niuernermullu Naalakkersuisoqarfiup pisortaa naapeqatigiinneq imatut eqqaavaa:
”EU-mik peqateqarnissamik tamatsinnut pissarsiffiusussamik isumaqatigiissuteqarpugut. Ukiuni arlaqartuni takusarparput EU-p annertuumik tapiissuteqartarnerata inuusuttortatsinnut meerartatsinnullu ilinniartitaanikkut iluaqutaanera. Peqateqarnissamik nutaamik isumaqatigiissuteqarnermi ataatsimut avatangiisinut ajoqutaanngitsumik aningaasarsiornikkut annertusaanerup salliutinneqarnera siunertaavoq pikkunartoq.”

Nungusaataanngitsumik aalisarneq pillugu illuatungeriinnut iluaqutaasumik peqatigiinnerup saniatigut manna tikillugu nunatsinni ilinniartitaaneq tamarmiusoq alaatsinaanneqarsimavoq – meeqqanit suli atualinngitsunit ilinniartitaanernut qaffasinnerusunut. Heidi Lindholm, Meeqqanut, Inuusuttunut Ilaqutariinnullu Naalakkersuisoqarfimmi pisortaq ima oqarpoq:
”Nunatsinni inuiaqatigiit allanngorartumik nungusaataanngitsumillu siunissaat meeraaqqanit meeqqerivinnillu aallartereertarpoq. Tamatumani nunatsinni meeqqat tamarmik inuunerminni aallartilluarnissaannik anguniagaq qulakkeerneqartarpoq.”

Peqatigiinnissamik isumaqatigiissut ”avatangiisinut ajoqutaanngitsumik annertusaaneq”-mik ilaneqarpoq. EU-p ilaatigut tapiissuteqarfigilersaarpai nunatsinni ataavartumik nukissiuteqarneq, issittumi ilisimatusarneq aamma nunatsinni pinngortitami pisuussutinik nungusaataanngitsumik atuineq.

EU-p Nuummi allaffeqarfissaanik ammaanissaq aamma oqaluuserineqarpoq, 2023-milu aasakkut tamatuma pinissaa naatsorsuutigineqarluni. Allaffeqarfiup EU-mut attaveqateqartarneq pitsaanerulersissavaa toqqaannarnerulersissallugulu.

Europa-Kommissionip nunattalu tulliani ataatsimeeqatigiinnissaat nunatsinni juni 2023-mi pisussanngorlugu pilersaarutigineqarpoq.

Nunatsinnit ataatsimiigiartut naalakkersuisoqarfinnit assigiinngitsuneerput, soorlu Nunanut Allanut, Inuussutissarsiornermut Niuernermullu Naalakkersuisoqarfimmit, EU-mi Nunatta Allaffeqarfianit, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmit, Meeqqanut, Inuusuttunut Ilaqutariinnullu Naalakkersuisoqarfimmit, Ilinniartitaanermut, Kultureqarnermut,

Timersornermut Ilageeqarnermullu Naalakkersuisoqarfimmit aamma Aatsitassanut Inatsisillu Atuutsinneqarnerannut Naalakkersuisoqarfimmit. Ataatsimiinnermilu Danmarkimi naalakkersuisut atorfilittaat aamma peqataapput.

Annertunerusumik paasisaqarusukkuit attavigiuk: Immikkoortortami pisortaq Dorthe Bidstrup dbip@nanoq.gl oqarasuaat: 345723