KNAPK-p tusagassiorfitsigut ullumikkut decembarip 16-ianni 2022-mi saqqummiussaanut akissuteqaat

Tupaallaatiginanngitsuunngillat KNAPK-ip ulluinnarni aqutsisuisa suleriaatsiminni periuseriligaat. Oqaloqatigiinnissamut periarfissarsioratik tusagassiorfitsigut saqqummiussinissaq aqqutigilermassuk.

Naalakkersuisuusugut oqaloqatigiinnissamut ammajuaannarpugut aamma periarfissagut tamaasa atorlugit oqaloqatigiinnissamut aggersaasinnaalluta.

Kattuffiup siulersuisui ulluinnarnilu aqutsisui pisariaqartitsigunik Naalakkersuisunik oqaloqatiginninnissaminnik tamanna pillugu ornigunnikkut saaffiginnissuteqartartuuppata, naatsorsuutigivara paatsuungasoqarani suliat pillugit eqqartuisoqartassagaluartoq.

Tusagassiorfitsigut saqqummiussaanni erseqqissaatigineqassapput makkua;

Aalisartut Piniartullu ataqqilluinnarlugit Naalakkersuisut sulipput. Sineriak tamangajaat angalaninni oqaloqatigivakka Naalakkersuisunilu suleqatikka aamma periarfissaqarnermikkut taama naapitsisarlutik. Aalisartut Piniartullu oqariartuutaasa sulinitsinni tunngaviliisuulluarneri maluginiagassaavoq, tassami sulinitsinni Naalakkersuisullu isummernissaannut tunngavissiatsinni tamanna takusassaajuarmat.

Naalakkersuisut kattuffiit sulinerinut akuleruttanngillat tamannalu pissusissamisoorpoq, taamaammallu akinut pissutsit kattuffiit tunisassiortut sulisitsisut sulisartullu akorngini suliassaapput Naalakkersuisuni akuleruffigineqartanngitsut.

Qilalukkat
Naalakkersuisut qilalukkanut pisassiissutit ukioq manna pisassiissutaasut naliginnaasumik inassuteqaatigineqartunit nikinganertaqarput, tamannalu KNAPK-imi issiasut tamarluinnarmik ilisimavaat. Naalakkersuisut ikinnerusunik pisassiinikuunngillat siunertaqaratillu.

Appat
Appat pillugit peqassutsimut inissisimanerat tamatta paasisimalereerparput. Ilisimatusaatigalugu pissutsit avaqqukkuminaapput, taamaammallu inuiaqatigiit nerisaqarnerinut pissutsinik allannguivallaannginnissaq siunertaralugu uumassusilerisut inassuteqaatigisaannit nikinganerusunik Naalakkersuisut appat pillugit pisassiinikuupput. Sivitsuinissamut pissutsit siusinnerusukkut Naalakkersuisunut isummersuuteqarfigineqassappata pisariaqarpoq kattuffik sioqqutsilluni suliaq pillugu saaffiginnissuteqarnissaa, piniarfiup matunissaa ullualunnguanik sioqqutsilluni pinnani.

KONFIFA - siunnersorteqarfik
Aalisartunut piniartunullu siunnersorteqarfik Inatsisartut Naalakkersuisunut sipaarniaqqusillutik peqqusineranit tunngaveqaqqaarpoq. Inatsisartut sipaarutaassanngitsoq aalajangerput taamaattorli aningaasalerneqarneranut oqaaseqaasiornerani avammut suliarinnittussarsiuussinikkut suliakkiutigineqassasoq pillugu Naalakkersuisuni suliaqassasugut aalajangiunneqarluni. Tamanna piareersarneqarpoq. KNAPK-lu isumaqatigiissuteqarnikkut ukiup affaanut tullermut atuuttussamik Naalakkersuisut isumaqatigiissutip sivitsorlugu atuukkallarnissaanik Inatsisartut aningaasaqarnermut ataatsimiititaanut noqqaasoqarpoq tamannalu utaqqineqarluni.

Inatsisartut allaffissornikkut sipaaqqusinerat naapertorlugu allaffissornikkut sipaarutaasinnaasut aallaavigalugit Naalakkersuisuni suliaqarpugut. Tassanilu aningaasat sipaarneqarsinnaasut KNAPK-p allaffeqarfiani allaffeqarnitsinnut attuumassuteqarput allamillu tunngaveqartinneqarsinnaanngilaq tamanna.

Tusarniaaneq
Naalakkersuisut pisassiissutissanik suliaqartillutik tusarniaaqqaartussaatitaagamik taama iliuuseqareerput. Aamma Tunup avataani saarullittassat pillugit taama pisoqarpoq.

Saattussanut pissutsit assigiinngilluinnartut eqqartorneqarput. Maanna Naalakkersuisut marlunnik periarfissanik ammaanikuupput. Siulleq aalisarfiup naliginnaasup avataani misileraasoqarsinnaalluni aappaalu akuersissutit sisamanngorsinnaalernerinut periarfissaq.

Naalakkersuisunit erseqqissaatigineqaqqittariaqarpoq aalisartut piniartullu peqatigilluinnarlugit sulinerit ingerlanneqarmata. Aamma taama ippoq aalisarneq pillugu inatsisissamut sulinitsinni. Allatut isummersortitsiniaalluni saqqummiussineq pissusissamisoortutut isiginngilara, Karl Tobiassen KNAPK-ip tusagassiorfitsigut saqqummiussaanut qisuariaateqarluni erseqqissaalluni naggasiivoq.


Sukumiinerusumik paasisaqarusukkaanni immikkoortortaqarfimmi pisortaq Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl