Siunertaq nutaaq, siulersuisullu nutaat, NunaOil A/S NunaGreen A/S-inngorpoq

Uuliamik gassimillu ujaasinerit unitsinneqarnissaat pillugu Naalakkersuisut 2021-mi aalajangiinerisa kingunerisaanik, Nunaoil A/S-ip siunertaa allanngorluni NunaGreen A/S-inngorpoq. Nukissiuutit ataavartut mingutsitsinnginnissarlu ingerlatseqatigiiffiup maanna suliassarilissavai. Tamatuma kingunerisaanik ingerlatseqatigiiffiup ileqqoreqqusai allannguuteqarput, siulersuisullu suliassamut tunngatillugu piginnaasalinnik nukittorsarneqarlutik. 

Manna tikillugu ingerlatseqatigiiffik Kalaallit Nunaata nunavittaani misissuinermut qalluinermullu pisinnaatitsissutini, misissueqataanngitsutut/qallueqataanngitsutut, peqatitut atuuffeqarsimavoq. 

Naalakkersuisut Siulittaasuat ima oqaaseqarpoq:
”Mingutsitsinngitsumik nukissiuutinut, power-to-x-imut kiisalu Issittumi ingerlassanut annertuunut annertuumik misilittagaqarlutillu ilisimasaqarluartut pingasut Naalakkersuisut siulersuisuni ilaasortanngortippaat. Ingerlatseqatigiiffiup siulersuisuini nutaani piginnaasat eqqortumik katitigaanissaat Naalakkersuisunut pingaaruteqarsimavoq. Siulersuisut siulittaasuata qanimut oqaloqatigineratigut, siunertarlu nutaaq eqqarsaatigalugu toqqaaneq pivoq.”

Volinka D. Augustenborg, University of California, Berkeley School of Law-imi eqqartuussissuserisutut ilinniarsimasoq siulersuisuni ilaasortanngortup aapparivaa. Volinkap Ørsted aamma Statkraft Energi sullillugit mingutsitsinngitsumik nukissiuutinik tunisinissaq immikkut ilisimasaqarfigalugu, mingutsitsinngitsumik nukissiuutit pillugit aningaasatigut naleqqussaanermik suliniutit suliaqarfigisimavai.

Morten Stilling pinngortitamik ilisimatusarnermik tunuliaqutaqarluni DTU-mi ingeniøritut ilinniarsimasoq, Nano-videnskabillu iluani Ph.d.-mik ilinniarsimasoq siulersuisuni ilaasortanngortup aapparivaa. Morten suliffeqarfiit assigiinngitsorpaaluit soorlu McKinsey, Dong Energy, Maersk kiisalu Ørsted mingutsitsinngitsumik nukissiuutinik ineriartortitsinerini suleqataalluni 2008-miilli atorfeqarsimavoq.

Siulersuisuni ilaasortat nutaat pingasuusut pingajorivaat Inúnguak Pedersen Abelsen Kalaallit Airports A/S-imi sanaartornermi pisortatut ikiortaasoq (Assisterende anlægschef). Inúnguak bygningsinginiøritut ilinniarsimasuuvoq ilaatigullu INUPLAN A/S, Viadania A/S aamma Orbicon Arctic A/S suliffigisimallugit. Kalaallit Nuaanni sanaartornikkut suliassatigut misilittagaqarpoq, immikkullu issittumi aatsitassarsiornerni annertuuni attaveqaasersuusiornerni misilittagaqartuulluni.

Ingerlatseqatigiiffiup siulersuisuini massakkut siulittaasuusoq Stine Bosse ingerlaqqiinnarluni ineriartortitsilluni suliffeqarfittaami siulittuussaaq.

Nukissiorfimmi allaffissornikkut pisortaaneq Cicilie Senderovitz kiisalu Naalagaaffimmit toqqagaalluni ilaasortaq, Susanne Juhl, siulersuisunit tunuarniarlutik aalajangerput. Ciciliep Susannellu Nunaoil A/S-imut piginnaasaminnik tunniussisimanerat pillugu Naalakkersuisunit qutsavigigineqarput.

Ingerlatseqatigiiffiup siulersuisuini ilaasortaasoq Air Greenlandimi Business Development Manageri Mikkel Krogh Søndergaardi, siulersuisuni ilaasortanngortut siulersuisuni ilaasortaaqatigissavaat. Siulersuisuni ilaasortat taakkua tallimaallutik siunissami NunaGreen A/S-ip mingutsitsinngitsumik nukissiuuteqalernissap ineriartortinneqarnissaanik qulakkeerinninnissaq pingaarnertut akisussaaffigissavaat. 

Ingerlatseqatigiiffimmi aqutsisut suleqatigalugit mingutsitsinngitsumik nukissiuuteqalernissap, ataavartumillu nukissiuutit siunissami ineriartortinneqarnissaasa sunniuteqarfigineqarnissaannut Naalakkersuisut qilanaarput. Tassunga tunngatillugu siulersuisutta qanoq katitigaanissaasa pingaaruteqassusia Naalakkersuisut ukkatarivaat, piginnaasallu misilittakkallu nalituut suli pigiinnarneqarnissaat, ingerlatseqatigiiffitsinnillu nukittorsaataasinnaasumik najukkami tunngavissiinissaq qulakkiissallugu.

Ingerlatseqatigiiffimmi aqutsisortaat sulilluarnissaannik Naalakkersuisut kissaappaat. 


Paasissutissat annertunerusut:
immikkoortortaqarfimmi pisortaq Jonas Smed Sørensen, Ingerlatseqatigiiffiit Allattoqarfiat, Naalakkersuisut Siulittaasuata Naalakkersuisoqarfia oqarasuaat 34 54 83.