Aalisarneq toqqissisimasumik ingerlanneqarpoq

Aalisarnermut Piniarnermullu Naalakkersuisoq, Karl Tobiassen, avannaani angalaqqammerpoq, Uummannami, Qasigiannguani Ilulissanilu aalisartunik piniartunillu decembarip sisamaannit aqqarnannut 2022-mi ataatsimeeqateqartarluni. 

-Tikitatsinni tamani malugaara aalisarneq toqqissisimasumik ingerlanneqartutut nalilerneqartoq, Karl Tobiassen erseqqissaavoq. 

Angalanermini pingaarnertut Inatsisartut ukiaq manna aalisarnermut piniarnermullu tunngassuteqartut pillugit sulinerat pillugu paasissutissiisarpoq. Aamma Aalisarnermut Piniarnermullu Naalakkersuisutut sulinini pillugu paasititsilluni.

Ataatsimiinnerni Inatsisartuni Naalakkersuisunilu sulinerit eqqartuiffigeriarlugit apriilimi Naalakkersuisutut ivertinneqarnerminiit maannamut suliarisimasani pillugit illoqarfinni tikitamini paasissutissiisarpoq. Minnerunngitsumik ataatsimeeqateqartarnermini aalisarneq pillugu inatsisissamut sulinini pillugu erseqqissaateqartarluni. 

Angalaneq aallarnerlugu Uummannami aalisartut piniartullu Edvard Krusep atuarfiata inersuani ataatsimeeqatigivai. 
Ataatsimiinnerup aallartinnginnerani nipilersoqatigiit “Uummannami juulli”-mik nipilersukkanik pingasunik nuannersunik ataatsimeeqataasut nipilersorfigineqarput. 

-Tikitatsinni tamani malugaara aalisarneq toqqissisimasumik ingerlanneqartutut nalilerneqartoq. Aalisartut taama naliliisinnaappata, allatut tamanna oqaatigisinnaanngilara, aalisarnermut politikerput pitsaasuullunilu patajaatsuusoq, Aalisarnermut Piniarnermullu Naalakkersuisoq, Karl Tobiassen, oqarpoq. 

Qasigiannguit qangalili tikissallugu pilersaarutigisarpaa, angalaniarnikkulli pissutsit pissutaallutik tikissinnaasimanagu aatsaat decembarip arfineq pingajuanni tikippaa.

Qasigiannguani aalisartut piniartullu peqatigiiffiannik ataatsimeeqateqarami ataatsimiinnermi aalisarneq pillugu inatsisissaq ilaatigut oqaluuserineqarpoq, aamma aalisarnermi kiisalu piniarnermi pissutsit arlalissuit aamma oqaluuserineqarput.

- Qasigiannguani aalisartut piniartullu peqatigiiffiat ataatsimeeqatigigakku assut iluarisimaarpara, aalisarnermi piniarnermilu pissutsinik tigussaasunik assigiinngitsunik ataatsimiinnermi oqaloqatigiissuteqaratta. Soorlu aamma ukiuunerani tuttunniartarneq oqaluuserineqartoq. Taanna Inatsisartuni immikkoortumut suliarineqartumut atatillugu tunngavissinneqarluarnera malugaara. Malunnarpoq tuttunniarfiusinnaasup suliami pineqartup qimussimik orninneqarsinnaanera sikup aalaakkaannginnerata kinguneranik pisinnaanngitsutut oqaatigineqarpoq, periarfissalli allat tikkuussissutigineqarlutik. Aamma ataatsimiinnermi paasissutissanik sulininni atorluarsinnaasannik immersorneqarpunga, Karl Tobiassen oqarpoq. 

Karl Tobiassenip Qasigiannguaniinnermini Isumaginninnermut, Suliffeqarnermut, Nunamullu Namminermut Naalakkersuisoq Jess Svane peqatigalugu innuttaasunik ataatsimiisitsivoq. 

Efterskole Villads Villadsenimi innuttaasunik ataatsimiititsisoqarpoq. 

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaaneq, Jørgen Isak Olsen. Email: jio@nanoq.gl