Nutaamik ilassummik isumaqatigiissutip nunatsinni sulinngiffeqarluni angalanermi periarfissat atuuttuaannartussanngorlugillu pitsaanerulersippai

Naalakkersuisut maj 2020-mi kattuffinnik arlalinnik pingaaruteqartunik tapiliussamik isumaqatigiissusiorpoq. Isumaqatigiissut pineqartoq 2021-mi sivitsugaareersoq, aamma 2022-i tamakkerlugu atuuffissalerlugu sivitsorneqartoq. Isumaqatigiissut 2023-mit atuuttuaannartussanngorlugu isumaqatigiissutigineqarpoq.

Isumaqatigiissutini AK-mi, IMAK-imi, PK/PKK-mi ASG-milu sulinngiffeqarnernut aningaasaateqarfiit ilaapput. Nalinginnaasumik akileraarusigaanngitsumik sulinngiffeqarnermi akiliunneqarluni angalanerit taamaallaat piffimmit suliffeqarfigisamit Københavnimut - imaluunniit piffimmi maani ornitamut allamut angalanermut tunngassuteqartarput. Kingullertut taaneqartumi billetip akiata piffimmit suliffigisamit Københavnimut utimullu akianit akisunerussanngitsoq killigitinneqarpoq. Maanna aaqqissuussinermi hotelini unnuinerit ilaalerput, taamaattoq akimut killiliussap siuliani taaneqartup iluani. Maleruagassatut tunngavigineqartup atuuttuaannangortussanngorneratigut aningaasat piffimmit suliffeqarfigisamit Københavnimut utimullu aningaasat atorneqartussaagaluartut, Kalaallit Nunaanni angalanermut atorneqarsinnaasunngorlugit allanngortinneqarsinnaapput aamma, nunatsinni angalaneq Københavnimut angalanermit akikinneruppat, ornitami hotelinut aningaasartuutit tamakkiisumik ilaannakortumilluunniit matussutigineqarsinnaapput. Kingulleq tapiliussamik isumaqatigiissuteqarnani periarfissaanngilaq. Angalanerup ataatsimut inniminnerneqarsimanissaa erseqqissassallugu pingaaruteqarpoq, taamattaaq aaqqissuussineq akiliunneqarluni sulinngiffeqarnermut aningaasaateqarfinnut aningaasartuutitigut allannguiffiunngitsoq, erseqqissassallugu pingaaruteqarpoq taamaalilluni angalasup hotelini unnuinerit, piffimmit suliffeqarfigisamit Københavnimut utimullu billetip akianit annertunerussutaat nammineerluni matussusertussaavai.

Aningaasaqarnermut Naligiissitaanermullu Naalakkersuisoq taanna pillugu ima oqarpoq: “Tuniluunnersuup iliuutsit assigiinngitsut allanngortissinnaanerinut periarfissippaatigut. Ilaatigut nammineq nunatsinni angalasinnaanermik periarfissinneqarpugut. Nuannaarutigeqaara periarfissaq tamanna atuuttuaannartunngortinneqarmat, isumaqatigiissummilu tassani akissarsiallit sulinngiffeqarnermi akiliunneqarluni angalanerit maani nunatsinni pisinnaaneri toqqarsinnaanngorpaat. Neriuppunga amerlasuut periarfissaq tamanna atorluarumaaraat, sulinermilu kattuffiit peqataasut suliami uani piumassuseqarluarlutik suleqatigiinnermik takutitsinerannut qujaffigerusuppakka. “

Kontakt: Frederik Schmidt, Toqq. 346681 fsch@nanoq.gl