AtuartigukIlaannakortumik akiliunneqarluni angalanerit akileraaruserneqanngillat
Nassiussisuuvoq: Aningaasaqarnermut Naligiissitaanermullu Naalakkersuisoqarfik
2023-mut Aningaasanut inatsisissap aalajangiiffigineqarneranut atatillugu Inatsisartut aalajangiiffigaat ilaannakortumik akiliunneqarluni angalanernut malittarisassat 2022-mi januaarip aallaqqaataani atuutilersut atorunnaarsinneqartut. Taamaattumik pineqartoq inatsisitigut 2021-mut sanilliullugu allannguuteqanngilaq. Sulisitsisut, akissarsiallit pisortani oqartussallu eqqumaffigissavaat 2022-miit tamatumalu kingorna malittarisassat pisoqqat malillugit ingerlatsisoqassammat.
Malittarisassaq pingaarneq suli tassaavoq, akissarsialittut ukiumut ataasiarlutit akileraaruteqaataanngitsumik akiliunneqarlutit angalasinnaagavit. Malittarisassap atorunnaarsinneqartup, sulinermut atatillugu angalanerup ilaata akileraaruteqaataanissaanik malitseqartussaagaluarmat angalanermut atatillugu ullut tallimat namminerisamik siunertanut atorneqartillugit. Kisianni Inatsisartut amerlanerussuteqartut aningaasanut inatsisissap suliarinerani, Naalakkersuisut siunnersuuteqarnerat naapertorlugu. inatsisiniit taanna peerneqarpoq,
Atorunnaarsitsineq, ilaannakortumik akiliunneqarluni angalanernut taamaallaat tunngavoq. Tamanna ima isumaqarpoq, 2023-mi januaarip aallaqqaataaniit akiliunneqarluni angalanerit allat aningaasarsiatut A-tut qaammatikkaartumik nalunaarutigineqartassammata.
Akileraartarnermut oqartussat erseqqissaatigissavaat, akileraaruteqaataanngitsumik akiliunneqarluni angalaneq ukiumut ataasiaannarluni pisinnaammat. Sulisitsisorli taassuma saniatigut akiliussilluni angalatitsippat taakku nalingi aallaavigalugit akileraaruteqaataassammata.
2023-mut aningaasanut inatsisissap suliarineqarneranut atatillugu, malittarisassaq nutaaq, oqaasertaliussatut taaneqartartoq atorlugu, Inatsisartunit aalajangiiffigineqarpoq, Oqaasertaliussaq taanna ukioq ataaseq atuutissaaq taamaattumillu akileraartarnermut aaqqissuusseqqinnissamut atatillugu ilanngullugu eqqartoqqinneqartariaqassalluni.
Oqaasertaliussaq tusagassiorfinnut nalunaarummi uani takussutissiaralugu ilanngunneqarpoq.
Attavigisassaq: Aqutsisoqarfimmi pisortaq Kim Neumann Nielsen, Oqarasuaat +299 346531, knn@nanoq.gl