Mimi Karlsen: Innarluut pillugu ilisimasagut siaruartertariaqarpavut

Inuit tamarmik allat assigalugit inuiaqatigiinni inooqataanissartik pisinnaatitaaffigivaat. Taamaattorli inuit innarluutillit atuarfinni, ilinniarnerminni, suliffeqarfinni allanilu sunngiffimmi sammisani peqataanissartik unammilligassaatissinnaavaat.

Inuiaqatigiit innarluuteqarneq nalinginnaasumik paasisinnaannginnamikku, inuit innarluutillit immikkoortitaasutut misigikulaartarsimanerat inuit innarluutillit peqatigiiffiisa eqqumaffigeqquaat. Tamanna immikkoortitsisarnermik isummanillu pigiliutiinnagaqarnermik aamma kinguneqalersinnaavoq.

Taamaattumik Naalakkersuisut innarluuteqarneq aamma innarluuteqarluni qanoq ittuunersoq pillugit ilisimasaqarneq inuiaqatigiinnut siaruarterusuppaat.
Nunarsuaq Tamakkerlugu Inunnut Innarluutilinnut Naalagaaffiit Peqatigiit ullorititaat videumik paasisitsiniaanermik malunnartinneqassaaq taassumalu innarluutilittut inuunerup qanoq ittuunersup ersarinnerulernissaa paasineqarnissaalu annertuninngortissavaa.

Video Tiliop facebookiata quppernerani takuuk: https://www.Facebook.com/Tilioq

- Inuit innarluutillit inuiaqatigiinni aporfeqartarneri akuerisariaqarivut pingaaruteqarpoq. Inuit innarluutillit akimmiffigisinnaasaasa sapinngisamik akimmiffeqarunnaarnissaannut tamatta akuuffigisariaqarparput, Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen oqarpoq.

Innarluutillit suliassaqarfiisa ilisimanerulernissaata annertusinissaa qulakkeerniarlugu Tilioq-mut aningaasanut inatsimmi aningaasaliissutit 2023-mut 1,5 mio. kr.-inik Naalakkersuisut qaffappaat.

- Tilioq innarluuteqarnermut ilisimasaqarnerulernissaq pillugu ilungersorluni suliaanut qutsavigaarput. Inuit innarluutillit ulluanni kikkut tamaasa ullorsiorluarnissaannik kissaappakka, Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen oqarpoq.

Naalakkersuisut aamma inunnut innarluutilinnut ulloq unnuarlu neqeroorutinut periusissamik nutaamik saqqummiussinikuupput, tassani sulisunik ilinniartitseqqinnissamut piginnaanngorsaqqiinermullu periarfissat ukkatarineqalerput. Inunnut Innarluutilinnut Nuna tamakkerlugu Ulloq unnuarlu Neqeroorutinut periusissaq 2022-2025-mi anguniarneqartoq tassaavoq innarluutilinnut suliassaqarfimmi perorsaanikkut sulinermi pitsaassutsimik kivitsinikkut inuit innarluutillit inuunerannik pitsaanerulersitsineq.

Sukumiisumik paasisaqarusukkuit naalakkersuisup allattaa Naja Lynge Petersen e-mailikkut nalp@nanoq.gl imaluunniit oqarasuaatikkut: +299 345000 attavigiuk