Avatangiisit Pinngortitarlu pillugit suliniuteqartunut 2022-mi nersornaaserneqartussat nassaarineqarput

Namminersorlutik Oqartussat Avatangiisit Pinngortitarlu pillugit suliniuteqartunut nersornaat 2022 Mina Hesslerimut Nuummeersumut aamma suliffeqarfimmut Two Ravensimut tunniunneqarput. Mina Hessler aamma Two Ravens meerartatta inuusuttortattalu qanoq pinngortitamik piujuartitsilluni atuinissaannik ilinniartitsillutik immikkut suliniuteqarsimaneri pissutigalugit nersornaaserneqarput.

“Meeqqatta inuusuttortattalu pinngortitamik piujuartitsilluni atuinissaannik isumassarsiortikkusuppavut ilinniartillugillu. Taannali kisiat suliniutaasinnaanngilaq. Pingaartitsillutik suliniuteqarusuttut, pinngortitap piujuartitsilluni atornissaanut meerartatsinnut inuusuttortatsinnullu ilinniartitserusullutik saniatigut immikkullu ittumik suliniuteqarusuttut amigaatigineqarput. Mina Hessler aamma Two Ravens iluatsilluinnartumik taamaaliorsinnaasimapput. Taamaattumik nuannaarutigingaarpara suliniutaannut annertuumut Naalakkersuisut Avatangiisit Pinngortitarlu pillugit suliniuteqarsimasunut nersornaataannik nersorneqarsinnaammata.

Inuiaqatigiinnitsinni maligassiuisoqarnissaq pingaaruteqarpoq, taamaaliorsimappullu Mina Hessler aamma Two Ravens. Taamaattumik Naalakkersuisut nersornaasiinerup saniatigut Mina Hessler aamma Two Ravens avatangiisimut pinngortitamullu sinniisunngortippaat. Avatangiisimut pinngortitamullu sinniisuunerisigut takuneqarsinnaassaaq suliniutiminnik pinngortitamik piujuartitsilluni atuinissaq pillugu najukkami inuiaqatigiinnut isumassarsiortitsisuusut, soqutiginnilersitsisuusut ilisimasanillu siammarterisuusut”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq nersornaasiinermut atatillugu oqarpoq.

Mina Hessler aamma Two Ravens Avatangiisit Pinngortitarlu pillugit suliniuteqarsimasunut nersornaaserneqarnerisa saniatigut Avatangiisimut pinngortitamullu sinniisutut aamma taaguutitaarput”. Tamatuma saniatigut nersornaammik tunniussinermi Nunalerinermut, Imminut Pilersornermut, Nukissiutinut Avatangiisinullu Naalakkersuisumit, Kalistat Lundimit avatangiisimut pinngortitamullu sinniisut kavaajaannik qorsummik tunineqarput.

Avatangiisit Pinngortitarlu pillugit suliniuteqarsimasunut nersornaat pillugu
Avatangiisit pinngortitarlu pillugit suliniuteqartunut nersornaammik ukiut tamaasa nersornaasiisoqartarnissaa Naalakkersuisut 2004-mi aalajangersimavaat. Nersornaasiineq siulleq 2007-mi pivoq kingornalu ukiut tamaasa nersornaasiisoqartarsimalluni. Kikkulluunniit nersornaaserneqartussamik innersuussassaqarunik tunngavilersuutitalimmik innersuussinissamut periarfissaqarput.

Avatangiisit pinngortitarlu pillugit suliniuteqartunut nersornaat pingaartitsillutik suliniuteqarusuttunut, avatangiisimut pinngortitamullu tamanut eqqummaarinnilersitsiniartunut aalajangersimasunilluunniit suliniuteqarnermikkut nunatsinni avatangiisimut pitsanngorsaasunut nersornaataavoq.

Upernaaq Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik Avatangiisit pinngortitarlu pillugit suliniuteqartunut 2022-mi nersornaammut piukkunnaatilinnik innersuussinissamik nunatsinni innuttaasut kajumissaariniarluni tusagassiorfinnut nalunaaruteqarpoq.

Paasisaqarnerorusukkuit Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi naalakkersuisoqarfimmi pisortaq Natuk Lund Olsen oqarasuaatikkut: 34 64 76 / 53 92 28 imaluunniit e-mailikkut: natl@nanoq.gl imaluunniit pan@nanoq.gl attavigiuk.