AtuartigukAsiaq nutaamik pisortartaarpoq
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
44-nik ukiulik Mette Skarregaard Pedersen nunalerinermi cand. scient.-tut ilinniarsimasoq 1. decembar 2022 aallarnerfigalugu atorfittaamini sulilissaaq.
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmiit naalakkersuisoqarfiup pisortaaneratut atorfimminngaanneerpoq. Atorfik ukiuni arfineq marlunni atorfigivaa, ilaatigut piujuartitsiviusoq, mingutsitsinnginneq, pinngortitaq, avatangiiseq, silap pissusia upalungaarsimanerlu siuttuuffigalugit.
Mette Skarregaard Pedersen 2005-imi Kalaallit Nunaanukarpoq, ukiunilu siullerni Ittoqqortoormiini Ilulissanilu najugaqarluni. Siusinnerusukkut Ilulissat Kangia-ni avatangiisinut pisortatut site manager-isullu atorfeqarluni aamma Namminersorlutik Oqartussani avatangiisinut upalungaarsimanermullu immikkoortortaqarfimmi immikkoortortaqarfiup pisortaanikuulluni.
”Nuannaarutigivara Mette Skarregaard Pedersen atorfinitsissinnaagatsigu. Sulianut tunuliaqutagissaartorujussuuvoq aamma inuiaqatigiinnut ilisimaarinnilluartuulluni. Matuma saniatigut ukiuni arlalinni aqutsisutut misilittagaqarpoq, pilersaarusiortumillu eqqarsartarpoq aamma inerniliinernut ineriartornermullu akisussaaffimmik tigusineq sungiusimavaa”, Nunalerinermut, Imminut Pilersornermut, Nukissiutinut Avatangiisinillu Naalakkersuisoq Kalistat Lund, oqarpoq.
Asiaq ilaatigut silap pissusia aamma sila, hydrologii, nuna, nunap sannaanut paasissutissat aamma nunap assiliornerit suliarisarpai.