AtuartigukPitsaaliuinikkut inissiinerit ikilisinneqarnissaat qulakkeerneqassaaq
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Kommuninik suleqateqarnermi ilaqutariinnik meerartalinnik atugarliortunik pitsaaliuineq katsorsaanissamillu neqerooruteqarneq salliunneqarnerussaaq. Ilutigitillugu meeqqap atugai aallaavigalugit pitsaanerusumik inissiisoqartassaaq.
Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen iliuusissatut pilersaarut nutaaq ”Pitsaaliuinerit pitsaanerit, inissiinerit ikinnerit: Ilaqutariinni pitsaaliuinermik suliaqarnermut iliiuusissatut pilersaarut 2023-2030” saqqummiuppaa.
Iliuusissatut pilersaarummi pitsaanerusumik pitsaaliuineq kiisalu meeqqat inuusuttullu inissinneqarsimasut atugaasa pitsanngorsarneqarnerat aqqutigalugu meeqqat inuusuttullu angerlarsimaffiup avataanut inissinneqartartut ikilisinneqarnissaat anguniarneqarpoq.
”Meeqqat paarinissaannut inersimasuusugut akisussaaffeqarpugut. Tamanna meeqqat angajoqqaaminniippata, ilaqutariinni paarsisartuniippata imaluunniit ulloq unnuarlu paaqqinnittarfimmiippata apeqqutaatinnagu atuuppoq. Akisussaaffipput pingaarnertut atuuppoq meeqqat paarsinissamut ilungersuuteqartuni angajoqqaaminniippata,” Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen oqarpoq.
Iliuusissatut pilersaarut Naalakkersuisut Danmarkimilu naalakkersuisut suliniutaaanni ”Kalaallit Nunaanni meeqqat inuusuttullu atugarliortut pitsaanerusumik suliniuteqarfiginissaat pillugu kalaallit qallunaallu oqartussaasoqarfiisa assigiinngitsunik suliallit akornanni suleqatigiinneq, 2020-2023”-mi aamma ” Angajoqqaat meeqqanik sumiginnaasarnerat akiorniarlugu nuna tamakkerlugu iliuusissanut pilersaarut, 2020-2030”-mi suliniutaareersunik arlaqartunik sanarfeqqiineruvoq.
Naalakkersuisut kommuninik suleqateqarlutil suliniutinik inerisaarusupput.
Naalakkersuisunit suliniutini misilittagaalluallersimasut kommunit suleqatigalugit atorneqassapput ilaqutariinnilu meerartalinni siusissumik iliuuseqarnikkut atugarliornermik sumiginnaanermillu pitsaaliuillutik. Tamassuma saniatigut kommunit pitsaaliuinermut inissiinermullu atatillugu ajornartorsiutaat aallaavigineqassapput.
Naalakkersuisut kommunit suleqatigalugit qulakkiissavaat, ilaqutariinni pitsaaliuinermik suliaqarnermi atugassarititaasut pitsaanerpaallutillu ataqatigiissarneqarnissaat kiisalu meeqqat atugaannik aallaaveqarlutik. Tamatumani meeqqat inuusuttullu ikinnerusut angerlarsimaffiup avataannut inissinneqartarnissaat qulakkeerniarneqarpoq.
Naalakkersuisut kommunit suleqatigalugit meeqqat inuusuttullu inissinneqarsimasut atugaannik pitsanngorsaanermik suliniutinik aamma inerisaaniarput. Meeraq angerlarsimaffiup avataanut inissinneqarpat meeqqap paarineqarnissamut, toqqissimanissamut ineriartornissamullu pisariaqartitaasa pingaartinneqarnissaat qulakkeerneqassaaq.
”Meeqqap inuunerani sapinngisamik siusinnerpaamik pitsaaliuinermik neqerooruteqarnissamut piareersimassaagut, aamma meeqqat oqartussaasunit angerlarsimaffiup avataanut inissinneqartut atuarlutik, ikinnguteqarlutik, sunngiffimmi sammisassaqarlutik meeraanermilu allanik nuannersumik pitsaasumillu inuullutik toqqissimasumik peroriartornissaat isumagissavarput,” Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen oqarpoq.
Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen, iliuusissatut pílersaarut nutaaq pillugu tusagassiortunik tallimanngornermi 25. novembari nalunaaqutaq 13:00 katersortitsissaaq.
Tusagassiortunik katersortitsineq Namminersorlutik Oqartussat tusagasiortunik katersortitsisarfian ingerlanneqassaaq.
Attavissaq
Paasisaqarnerusunissamut attavigineqarsinnaavoq Naalakkersuisup allttaa Tuperna Kristensen e-mailimut: tukr@nanoq.gl imaluunniit oqarasuaammut: +299 34 55 83