AtuartigukMeeqqat isumaat: Naalakkersuisut meeqqat aalajangiinernut ilaatikkusuppaat
Meeqqat pisinnaatitaaffii pillugit Naalagaaffiit Peqatigiit isumaqatigiissutaata malinneqarnera qaffatsinniarlugu Naalakkersuisut iliuusissatut pilersaarummi nutaami nutaanik suliniusiornikuupput. Meeqqat namminerminut tunngasunik aalajangiinerni annertunerusumik ilaatinneqartarnissaannut iliuusissatut pilersaarut qulakkeerinnissaaq.
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Meeqqat naleqassutsimikkut angerlarsimaffimmi avataanilu iliuuseqarfigineqarnerminni sunnerneqartarput. Aamma ulluunerani paaqqinnittarfinni, atuarfinni, peqqinnissaqarfimmi ikinngutillu ilaginerini allallu isumassuisut ilagigaangamikkit sunnerneqartarput. Meeqqat ulluinnarminni unammillernartunik misigisaqartarput. Taamaattumik oqariartuutaat isumaginnittoqarfiit assigiinngitsut akornanni ilanngunneqartarnissaat Naalakkersuisut pingaartippaat.
”Pitsaasumik toqqissisimanartumillu peroriartorneq inuusuttuunissamut inersimasuunissamullu pitsaasumik tunngaviliisarpoq. Meeqqat tamarmik tamatta toqqissisimanartumik peroriartortinnissaannik ikiortariaqarpavut. Sumiluunniit meeqqat peroriartorunik, kikkulluunniit angajoqqaarigunikkit, inuunermut pisariaqartitaasut suulluunniit pigigaluarunikkit, taava pitsaasumik toqqissisimanartumillu peroriartortariaqarput” taama Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen oqarpoq.
Meeqqat pisinnaatitaaffii pillugit Naalagaaffiit Peqatigiit isumaqatigiissutaata malinneqarnissaa pillugu iliuusissatut pilersaarummi nutaami, suliniutit nutaat aallartereersullu aallaavigalugit Naalakkersuisut siunertaqarluartumik anguniarlugu sulissutigivaat.
Meeqqat pisinnaatitaaffii pillugit Naalagaaffiit Peqatigiit isumaqatigiissutaata malinneqarnissaanut iliuusissatut pilersaarut 2023-2030-mi suliniutit 24-t nassuiarneqarput, taakku meeqqanut tamanut, paaqqinnittarfinnut isumassuisunullu sammititaapput.
Iliuusissatut pilersaarummi sammisat katillugit tallimat eqqartorneqarput; Meeqqat isumaat, Ilaquttat, toqqissisimaneq sinaakkutillu, Nakuusernermit, innarlerneqarnermit atornerlugaanermiillu illersugaaneq, Ilinniarneq ineriartornerlu kiisalu Peqqinneq aammalu inuuniarnermi atugassarititaasunut ineriartornermik qulakkeerinnittoq.
Suliniut 1 atorlugu naalakkersuisoqarfiit assigiinngitsut aqutsisoqarfiillu akornanni meeqqat ilaatinneqartarnissaannut ukkassineq periutsitut atorlugu patajaallisinniarpaat. Pingaarnersiuinerni aaqqiissutinilu namminerminnut tunngasunut, peqatigisaanillu pisariaqartitaannik naapertuuttunut meeqqat ilaatinneqarlutik misigissagaat anguniagaavoq.
Tamatuma saniatigut Meeqqat Illersuisoqarfiata MIO-p Nakuusamilu MI, meeqqat taasinerat qanigisani inuiaqatigiinnilu nalinginnaasumi nukittorsarneqartariaqartoq tikkuarpaat. Tamatuma saniatigut qanigisani nalinginnaasumillu inuiaqatigiinni meeqqat isumaasa nukittunerulernissaannik pisariaqartitsisoqartoq Meeqqat Illersuisoqarfiata MIO-p Nakuusamilu MI-p uparuarnikuuaat.
Suliniutip 2-p Nakuusap patajaallineqarnissaa siunertarivaa. Tamatuma saniatigut meeqqat Naalakkersuisuni naalakkersuisoqarfinnilu assigiinngitsut akornanni sulianut ingerlasunut paasitinneqarlutillu aamma ilaatinneqassapput.
”Meeqqat inuunerminni suut initoorujussuunersut nalunngilaat. Tamassuma paasiniarluarnissaanut pikkorinnerunissarput anguniagarivarput” Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen oqarpoq.
Iliuusissatut pilersaarut ilaatigut Meeqqat Illersuisoqarfiata MIO-p saqqummersitaanit Naalagaaffiit Peqatigiit Meeqqat Pisinnaatitaaffii pillugit Isumaqatigiissutaannik Kalaallit Nunaanni piviusunngortitsiniarnissamut nuna tamakkerlugu iliuusissamik pilersaarutissamut meeqqat inassuteqaataat-nit isumassarsiorfigineqarpoq, taanna 2015-2018-imi sineriak tamakkerlugu apeqqutit immersugassallit atorlugit meeqqanik 295-inik misissuinermit tunuliaqutaqarluni sananeqarsimavoq.
Meeqqat soqutigisaat pitsaasumillu meeraanissaminnut pingaartinnerpaasaat iliuusissatut pilersaarummi sammisani aallaavigineqarput.
Iliuusissatut pilersaarut uani atuaruk
Attavissaq
Paasisaqarnerorusukkuit naalakkersuisup allattaa Tuperna Kristensen attavigiuk e-mail tukr@nanoq.gl imaluunniit oqarasuaatikkut: +299 34 55 83