2023-2026-mut Naligiissitaanermut Siunnersuisoqatigiit nutaat

Naalakkersuisut toqqarneqartussatut inassutigineqartut aallaavigalugit Naligiissitaanermut siunnersuisoqatigiinni ilaasortanik nutaanik toqqaapput. Siunnersuisoqatigiit 1. januar 2023-mit 31. december 2026-mut atuuffeqassapput.

Naalakkersuisut nuannaarutigalugu nalunaarutigisinnaavaat Kathrine Bødker Kalaallit Nunaanni Naligiissitaanermut Siunnersuisoqatigiinnut siulittaasutut toqqaqqinneqarmat.

Kathrine Bødker 8. marts gruppimit toqqarneqarpoq, aammalu 2019-2022-mi Naligiissitaanermut Siunnersuisoqatigiinnut siulittaasuusimalluni.

2023-2026-mut Siunnersuisoqatigiinnut ilaasortatut toqqarneqartut tassaapput:

• Kathrine Bødker, 8. marts gruppen (siunnersuisoqatigiinni siulitaasoq)
• Britta Keldsen, Sulisitsisunit inassutigineqartoq
• Rasmine Hansen, MIO-mit inassutigineqartoq
• Grethe Siegstad, meeqqanik ilaqutariinnillu katsorsaanermut immikkoortortaqarfimmit inassutigineqartoq 
• Mads Pedersen, Atorfillit Kattuffiannit inassutigineqartoq 
• Sofus Fenger Hove, Greenland+-imit inassutigineqartoq
• Mikkel Andreasen, Unicefimit aamma Kalaallit Meerartaannit inassutigineqartoq

Aningaasaqarnermut Naligiissitaanermullu Naalakkersuisoq, Naaja H. Nathanielsen, oqarpoq:

”Naligiissitaanermut ilaasortat ataatsimoorlutik Naalakkersuisut naligiissitaanermut suliassaqarfimmi anguniagaqarnerannik tapersiinissamut ineriartortitsinissamullu pisariaqartunik piginnaasaqarput ilisimasaqarlutillu. Siunnersuisooqatigiit meeqqat, inuusuttut, inuussutissarsiortut, inatsisilerinerup iluanni suliassaqarfinnit atituumik katitigaapput aammalu nakuusernerit inissisimanerannut allanullu suiaassutsimut tunngasunut paasisimasaqarlutik. Siunnersuisoqatigiit suleqatigilluarnissaat qilanaaraara, tassami suiaassutsikkut naligiissitaaneq qulequtaavoq pingaartittorujussuusara. Siunnersuisoqatigiit nunatsinni angutinut arnanullu pitsaasunik atugassaqartitsinissamik qulakkeeriniarluni suliaqarnermi eqeersimaartumik peqataanissaat tatigaara. Peqatigisaanik piffissaq iluatsillugu siunnersuisoqatigiinni ilaasortat sulilluarsimanerannut qutsavigaakka.”

Paasissutissanik annertunerusunik piniarnermi A/C fuldmægtig Najaaraq Josefsen, Aningaasaqarnermut Naligiissitaanermullu Naalakkersuisoqarfimmiittoq mailikkut najn@nanoq.gl attavigineqassaaq.