AtuartigukAalisartut piniartullu ullorsiornissinni pilluaritsi
Nassiussisuuvoq: Aalisarnermut Piniarnermullu NaalakkersuisoqarfikAalisarnermut Piniarnermullu Naalakkersuisutut nunatsinni aalisartut piniartullu ulluanni pilluaqqungaarpakka.
Ilissinnut ulloq manna ulloritinneqartoq pingaaruteqartupilorujussuuvoq, soorlu aamma uanga nammineerlunga ulloq immikkuullarissoq pingaartikkiga tamannalu uannut pingaaruteqartuaannarluni.
Nunatsinni sumiiffippassuarni aalisartut piniartullu peqatigiiffii aalisartut piniartullu imaani ajunaarsimasut eqqaassutissaasa eqqaanni nigalilianik, ajunaarsimasut ataqqillugillu eqqaaniarlugit ullumi ilisisusi, naalagiaqatigiittoqartorlu ilisimavara. Tamanna ileqquuvoq kusarnarluinnartoq.
Aalisartortavut piniartortavullu inuussutissarsiutiminni ilaatigut ilungersunarsinnaasumi, aningaasarsiornerminni ilaquttaminnillu pilersuinerminni, imaani ajunaarsimasut eqqaaneqarneri ataqqillugit qanigisaasunut qamannga piusumik inuulluaqqussutiga matumuuna anngukkusuppara.
Upernaaq Naalakkersuisunngorninnit KNAPK-mik, taassumalu siulersuisuinik pitsaasumik maannamut suleqateqarnera qujassuteqarfigerusuppara. Qamannga pisumik neriuppunga siunissami suleqatigiilluartarumaarluta, suleqatigiissutigisassagummi amerlaqaat.
SQAPK-mi QAK-milu siulersuisunut aamma ilaasortaanut pilluaqqusivunga, kattuffiup siulersuisui aalisarnermi atukkat pitsaanerulernissaannik mikinngitsumik suliniuteqartuarmata.
Nunatsinni Nanortalimmit Kullorsuarmut aalisartorpassuit piniartorpassuillu upernaaq aasarlu manna ataatsimeeqateqartarnerinut angisuumik qujaffigerusuppakka. Aalisarneq pillugu Ataatsimiitsitaliarsuup isumaliutissiissutaata innersuussutai pillugit ataatsimiittarnerni qitiupput.
Ataatsimiittarnerni tunuarsimaarasi tunniussimallusilu peqataasarnissinnut qujavunga, misigisimavunga Naalakkersuisut aamma Inatsisartut inatsisissaq kisimik oqaasissaqarfiginngikkaat, inatsisissamut ilissi aamma tunngaviliisutut oqaatigineqarsinnaagassi. Ilissimiuna pillusi ajunngitsussaq pillugu suliaqartugut.
Piniartut puisit amiinik pitsaanerusumik tunitsiveqalernissaat pillugu sulissutigineqartoq nunatta ammeriviani Qaqortumiittumi aasaq manna ilisimatinneqarpunga. Neriussaanga piniartut ameerniartarnerat siunissami suli pitsaanerulerumaartoq.
Inussiarnersumik inuulluaqqusillunga,
Aalisarnermut Piniarnermullu Naalakkersuisoq, Karl Tobiassen
Attavigineqarsinnaavoq Aalisarnermut Piniarnermullu Naalakkersuisoqarfimmi pisortaq, Jørgen Isak Olsen. Email: jio@nanoq.gl