Ukioq missingersuusiorfik 2023-mut kommuninut ataatsimoortumik tapiissutinut tunngatillugu isumaqatigiissusiortoqarpoq

Ullumi 15. november 2022-mi Aningaasaqarnermut Naligiissitaanermullu Naalakkersuisoq, Naaja Hjelholt Nathanielsen, aamma nunatta borgmesterii tallimat 2023-mut kommuninut ataatsimoortumik tapiissutinut isumaqatigiissummik atsiorput. Isumaqatigiissummi kommuninut ataatsimoortumik tapiissut 2023-mut 1.652,6 mio. kr.-uvoq.

Naaja Hjelholt Nathanielsen tamatumunnga atatillugu ima oqaaseqarpoq:

”Ataatsimoortumik tapiissutinut isumaqatigiissut imaaliallaannaq takkunneq ajorpoq, tamannali kommunit aamma Naalakkersuisut akornanni isumaqatigiinniarnikkut ammasumillu oqaloqatigiinnikkut inernerulluni. Taamaammat kommuninik ataatsimoortumik tapiissutinut isumaqatigiissuteqarneq peqataasunut tamanut ajugaanertut isigivara. Tamatumunnga 2022-mut kommuninut ataatsimoortumik tapiissutinut pitsaasumik, teknikikullu suliareqqissaagaasumik tamatumanilu suliami isumatusaartumik oqaloqatigiinnertalimmik, isumaqatigiissuteqarnermut inerneruvoq. Tamanna Naalakkersuisoq akisussaasutut nuannaarutigiinnarsinnaavara”

Naalakkersuisorlu nangippoq:
”Kommunit manna ukiumi aningaasanut inatsisissatut siunnersuummik isumaqatiginninniarnermi pisortanit ikiorsiissutinik aamma suliffissarsiornermi ikiorsiissutinik, 1. januar 2023-mi atuutilertussaagaluartunik, atuutsitsinissamik kinguartitsinissaq qitiutippaat. Tamatumani pissutaavoq, aaqqissuussat ilapittuutaasussat suli piariinngimmata. Naalakkersuisut inatsit taakku 1. juli 2023-mi atuutilersinneqarnissanut kinguartitsinermik inatsisissamik siunnersuusiornissaannut isumaqatigiissuteqarnerput nuannaarutigaara. Inatsisissatut siunnersuut maanna ataatsimiinnermi Inatsisartunit suliarineqassaaq.”

2022-mut kommuninut ataatsimoortumik tapiissutinut isumaqatigiissut 2023-mut aningaasanut inatsisissatut siunnersuutip pingajussaaneerneqarneranut ilanngunneqassaaq, taamaammallu Inatsisartut naggataajusumik akuersinerat tamatumunnga sunniuteqarsinnaassalluni.

Kommuninut ataatsimoortumik tapiissutinut isumaqatigiissut kalaallisut qallunaatullu Naalakkersuisut nittartagaani Aningaasaqarnermut Naligiissitaanermullu Naalakkersuisoqarfiup quppernerani nassaarineqarsinnaavoq.

Attavigisassaq:
Nikolai S. Christensen (Naalakkersuisoqarfimmi Pisortaq)
Toqq/direkte 34 66 75
NSCH@nanoq.gl