AtuartigukAngerlarsimaffeqanngitsuuneq pillugu misissuineq
Isumaginninnermut, Suliffeqarnermut Nunamullu Namminermut Naalakkersuisoqarfik Socialt Udviklingscenterimit (SUS) ”Kalaallit Nunaanni angerlarsimaffeqanngitsuuneq” pillugu misissuisitsivoq. Maannakkut Naalakkersuisut angerlarsimaffeqanngitsuuneq pillugu periusissiamik suliaqarnerannut misissuineq ilisimasanik tapersiissaaq.
Nassiussisuuvoq: Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik
Angerlarsimaffeqanngitsuuneq pillugu misissuineq itinerusumik allanngorarnerusumillu paasisaqarfiuvoq. Angerlarsimaffeqanngitsuuneq pillugu suliassaqarfimmi ineriartortitsinermik suliaqarnermut ilisimasanik pingaarutilinnik kinaassusersiunngitsumillu misissuineq tapersiivoq, aamma Naalakkersuisut angerlarsimaffeqanngitsuuneq pillugu periusissiaannut takkuttussamut nalunaarusiaq ilisimasanik tunngavissiissaaq. Misissuinerup nassuiarpaa, pissutsit assigiinngitsut sunniivigeqatigiinneratigut angerlarsimaffeqanngitsuuneq pilersartoq, soorlu illoqarfinni nunaqarfinnilu inissaaleqineq, innuttaasut isertitaat aningaasallu tigoriaannaat appasissut kiisalu tarnikkut timikkullu unammillernartut. Nalunaarusiami naliliiffigineqarpoq innuttaasut angerlarsimaffeqanngitsut ikiornissaannut tapersersornissaannullu annertuumik suliniuteqarnissamik pisariaqartitsisoqartoq.
”Angerlarsimaffeqanngitsuuneq pillugu misissuinermik kinaassusersiunngitsumik suliaqartitsivugut, tamatuminnga suliassaqarfimmi unammillernartunut tunngatillugu peqqissaarussamik pitsaasumillu paasisaqarfiusoq. Misissuinermi tikkuarneqarput eqimattanut innuttaasunut atugarliortunut neqeroorutit piusut naammanngitsut. Suliassaqarfimmi ajornartorsiutit Naalakkersuisut eqqumaffigaat innuttaasunullu atugarliortunut angerlarsimaffeqanngitsullu tunngatillugu pissutsit pitsanngorsaaviginiarlugit ilungersuuteqarput”, Jess Svane, Isumaginninnermut, Suliffeqarnermut Nunamullu Namminermut Naalakkersuisoq oqaaseqarpoq.
Misissuinermi tikkuarneqarpoq, angerlarsimaffeqanngitsut angerlarsimaffeqanngitsuunermiit ikiorniarlugit kommunit amerlanertigut isumalluuteqarnermut, sinaakkutinut aamma piginnaasanut tunngatillugu naammattunik peqarneq ajortut. Nalunaarusiami ilanngullugu takuneqarsinnaavoq, suliassaqarfimmi suliaqartut innuttaasunut inersimasunut atugarliortunut qaninnerujussuarmik suleqatigiinnermik nukittorsaasariaqartut, suliassaqarfiit suliniutillu akornanni misilittakkanik avitseqatigiinneq ataqatigiissaarinerlu pitsaanerusut qulakkeerniarlugit.
”Misissuinerup takutippaa, innuttaasunut atugarliortunut aamma inersimasunut angerlarsimaffeqanngitsunut suliniutit ataqatigiinneri killeqartut. Suliassaqarfimmi suliniutit annertusarnissaannik pisariaqartitsineq Naalakkersuisut eqqumaffigaat, tamannalu pingaarnersiuinermi salliutinneqarpoq. Nalunaarusiami uparuarneqartut Naalakkersuisut angerlarsimaffeqanngitsuuneq pillugu periusissiamik suliaqarnerannut ilanngunneqarumaarput”, Jess Svane, Isumaginninnermut, Suliffeqarnermut Nunamullu Namminermut Naalakkersuisoq oqaaseqarpoq.
Misissuineq Naalakkersuisut angerlarsimaffeqanngitsuuneq pillugu periusissiaannut 2022-mi saqqummertussamut ilisimasanik tunngavissiilluni tapersiissaaq.
Nalunaarusiaq uani atuaruk
Attaveqarfissaq
Erseqqinnerusumik paasisaqarniaruit attaveqarfigiuk naalakkersuisup allattaa Helene S. Pedersen e-mailikkut: hspd@nanoq.gl oqarasuaatikkulluunniit + 299 34 56 11