AtuartigukNaalakkersuisut Peqqinnissaqarfik pillugu isumasioqatigiinnissamut paasisassarsiorlunilu pulaarnissamut qinikkanik qaaqqusipput
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Piffissami kingullermi nunatsinni qinikkat innuttaasullu akornanni peqqinnissaqarfik pillugu oqallittoqarsimaqaaq.
Tamanna pillugu Naalakkersuisut tamakkerlutik Peqqinnissaqarfik aamma inuiaqatigiit peqqissusaat pillugu isumasioqatigiipput, tamatumani Nunatsinni nakorsaaneqarfimmiit, Peqqinnissaqarfimmiit aamma innuttaasut peqqissusaanik nakkutilliisumiit saqqummiisoqarpoq. Aamma Peqqissutsimut Aqutsisoqarfimmiit, peqqinnissaqarfimmik ingerlatsinermik aqutsisumit saqqummiussisoqarpoq.
Tamatuma kingorna Ilaqutariinnermut Peqqissutsimullu Ataatsimiititaliaq kiisalu Aningaasaqarnermut Akileraartarnermullu Ataatsimiititaliaq Dronning Ingridip Napparsimavissuanut aamma tarnikkut napparsimasunut katsorsaavimmut A1-mut ilisimasassarsiorluni pulaarnermik qaaqquneqarput.
Peqqissutsimut Naalakkersuisoq, Mimi Karlsen ima oqarpoq: ”Peqqinnissaqarfik innuttaasullu peqqissusaat inuiaqatigiinni tamani attuisuuvoq, aningaasaqarniarnermiit ulluinnarni inuuniarnermut, inissaqarniarnermut attaveqaqatigiinnermut il.il. Taamaattumik politikeriusugut peqqinnissaqarfik pillugu paasissutissanik piviusunik ilisimasaqarnissarput pingaaruteqarpoq, taamaaliornikkut ilisimasat nutaat tunngavigalugit siunissaq eqqarsaatigalugu aalajangigassat pisariaqartut aalajangiiffigisinnaassavagut”
Nangillunilu oqarpoq:
”Peqqinnissaqarfik pillugu oqaloqatigiinneq naammasseqajanngilaq, nunatsinni politiikerinut folketingimilu ilaasortassanut paasisassarsiorluni pulaarnissamut amerlanerit qaaqquniarlugit pilersaarutigaara. Kinaluunniit Folketinngimut qinigaagaluarpat pingaaruteqarluinnarpoq ataatsimoorluta peqqinnissaqarfik pitsanngorsarniarlugu inuiaqatigiinnut iluaqutaasumik suleqatigiinnissaq”