Oktoberi 2022 Vivian Motzfeldt Islandimi Arctic Circle Assemblymi peqataavoq

Oktober 2022 Islandimi Arctic Circle Assemblymi Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt Issittumi aningaasaliinermut periarfissat pillugit ataatsimoortitsilluni sammisaqartitsinermi pingaarnertut oqalugiartuuvoq. Oqalugiarnermi nunatsinni takornariaqarnikkut, nukissiuutit ataavartut aatsitassarsiornerullu periarfissai ersarissarneqarput.

Vivian Motzfeldt ima oqaaseqarpoq:

”Nunap inissisimanera pillugu politikkimi inissisimaneq ukkatarinerullugu nunatta inuussutissarsiornikkut niuernikkullu periarfissat nukittorsarlugillu ineriartortinnissaat pingaaruteqarpoq. Iligisavut suleqativullu uagutsitut isumallit suleqatigalugillu niueqatigerusuppavut. Nunanik allanik soqutigisaqaqatigiinnillu suleqateqarutta malittarisassavut innutaasullu ataqqineqarnissaat toqqammavigineqassapput.”

Aammattaaq Vivian Motzfeldt Polar Law Symposiumimi pingaarnertut oqalugiarpoq, tassanilu pingaartumik nunarsuarmioqatigiinni nunatta pingaaruteqarnera aammalu nunatta akunnaatsumi inissisimanera ersarissarlugu ukkataraa.

Arctic Circle Assemblymut malitsigitillugu Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt soqutigisaqaqatigiinnik assigiinngitsunik nunatsinni suleqateqarnermi nukittorsaaqataarusuttunik ataatsimeeqateqarpoq. Ataatsimeeqatigineqartut ilaatigut makkuupput, Skotlandip Nunanut Allanut ministeria Angus Robertson, Islandip Nunanut Allanut ministeria Thórdís Kolbrún Reykfjörd Gylfadóttir, Savalimmiormiut Nunanut Allanut ministeria Jenis av Rana, Harvard Kennedy Schoolip aqutsisua Douglas Elmendorf, Fortescue Future Industries Pty Ltd-ip siulittaasua Julie Shuttleworth, aammalu Sasakawa Peace Foundationip siulittaasua Atsushi Sunami.

Ataavartumik nukissiuuteqarneq malinnaavigeqqissallugu immikkut soqutigineqarpoq.

Naalakkersuisup aamma Icelandic Tourist Board naapippai, nunatsinni takornariaqarneq pillugu siunissami malittarisassaliorneq isumassarsiorfiginiarlugu.

Arctic Circle Assemblymi pisarneq malillugu nunarput soqutigineqarluarpoq, tassani nunatta nunarsuarmioqatigiinni/issittumi pingaarutilimmik inissisimanera tassuuna naqissuserneqaqqilluni.

Annertunerusumik paasissutissanik pissarsiumagaanni Naalakkersuisumut allatsi Arnaruluk Lundblad +299 345682, imaluunniit e-mail: alun@nanoq.gl atorlugit attavigineqarsinnaavoq.