Center for Cybersikkerhed Digitalimik Sullissinermut Aqutsisoqarfillu nittartakkakkut sillimaniarneq pillugu isumaqatigiissuteqartut

Kalaallit Nunaanni nittartakkakkut sillimaniarnerup pitsanngorsarneqarnissaa anguniarlugu Center for Cybersikkerhed, Danmarkimi Naalagaaffiup isertortumik paasiniaasarfianut attuumassusillit, Digitalimik Sullissinermut Aqutsisoqarfillu suleqatigiinnissamut isumaqatigiissuteqarput.

2020-p ingerlanerani Kalaallit Nunaanni Naalakkersuisuit Danmarkimilu Naalakkersuisut nalunaarutigaat Kalaallit Nunaanni nittartakkatigut siorasaarisoqarnissaanut pinaveersaartinniarlugu nittartakkatigut paasissutissanillu paarinneriaatsip qulakkeernissaa anguniarlugu Kalaallit Nunaanni Danmarkilimi oqartussaqarfiit suleqatigiissasut. Maanna Center for Cybersikkerhed (CFCS) Digitalimik Sullissinermut Aqutsisoqarfillu, Kalaallit Nunaanni nittartakkatigut paasissutissanillu paarinninnermut sullissisuusoq, isumaqatigiissuteqarput. Isumaqatigiissummi nassuiarneqarsimavoq immikkoortortaqarfiit qanoq sunullu suleqatigiissanersut.

”Ukiuni kingullerni Kalaallit Nunaanni suliffeqarfinni namminersortuni oqartussallu suliffeqarfiutaanni nittartakkatigut saassussinerit malunnartumik amerleriarsimapput. Nunat tamalaat akornanni navianarsinnaasut maanna Kalaallit Nunaannut aamma anngussimapput. Taamaattumik pingaaruteqarpoq Kalaallit Nunaanni nittartakkakkut paasissutissanillu paarisaqartarnermut tunngatillugu pikkorissunit siunnersorneqartariaqartugut kiisalu piginnaanernik qaffassaanissaq ukkatarineqartariaqartoq. Tamanna qulakkeerniarlugu Center for Cybersikkerhedimut isumaqatigiissuteqarpugut”, Naalakkersuisut siulittaasuat Múte B. Egede taama oqarpoq.

“Naalagaaffiit avataaneersut pinerlunniarlutillu hackerisartut Kalaallit Nunaanni nittartakkatigut ulorianartorsiortitsiuarput. 2022-p ingerlanerani nittartakkatigut saassussinerit arlallit naammattoorpagut, taakkua Kalaallit Nunaanni inuiaqatigiinni sullissiniarnernut arlalinnut sunniuteqarsimapput, ilaatigut qitiusumik allattoqarfimmi innuttaasunut sullissiviit ajutooqqasimapput aammalu peqqinnissaqarfiit saassunneqarsimallutik. Saassussinerit pineqartut takutippaat nittartakkatigut saassussinissamut ulorianartorsiornerit qanoq sakkortutiginersut. Nittartakkatigut paasissutissanillu paarinnittarneq pillugu suleqatigiissuteqarnitsigut pingaaruteqarluinnarpoq ersarissumik suleqatigiiffissagut suussusersineqarnissaat, qanoq iliorluta ingerlatsineq aammalu Kalaallit Nunaanni nittartakkatigut sillimaniarneq qulakkeerneqarsinnaappa?”, Center for Cybersikkerhed-imi pisortaq, Thomas Flarup taama oqarpoq.

CFCS Digitalimik Sullissinermut Aqutsisoqarfillu ilisimasanik misilittakkanillu avitseqatigiinnissaq anguniarlugu ingerlaavartumik naapittassapput. Isumaqatigiissummut ilaliullugu oqartussaqarfiit ilaatigut suleqatigiissutiginiarpaat Kalaallit Nunaanni nittartakkakkut paasissutissanillu paarinninneq pillugu piginnaasanik ineriartortitsinissaq pitsanngorsarneqarnissaa, taamaaliornissamullu CFCS Digitalimik Sullissinermut Aqutsisoqarfimmi sulisunut pikkorissaassaaq. Taassumalu saniatigut Kalaallit Nunaanni nittartakkakkut paasissutissanillu paarinninneq pillugu CFCS Digitalimik Sullissinermut Aqutsisoqarfimmut siunnersuisassalluni.

Nunat marluusut akornanni suleqatigiinniarnerminni ilaatigut attaveqaatit mianertartut illersorneqarnissaat sulissutigisinnaavaat. Kalaallit Nunaanni attaveqaatit mianernartut suussusersineqassapput, nunallu taakkua marluk akornanni, naalagaaffik ataatsimut isigalugu, attaveqaatit mianerinarnerpaat illersorneqassapput. Suleqatigiinnermi Kalaallit Nunaanni oqartussaqarfiit siliffeqarfiillu naapertuuttut CFCS-ip attaveqarfiannut inississorneqarsinnaapput. CFCS-ip attaveqarfiannut ikkunnikut nittartakkatigut saassunneqassagaluarunik ikiorneqarnissaat periarfissaqarneruvoq.

Nittartakkatigut saassussisoqarataarsinnaanera qaquguluunniit pisinnaavoq pimoorunneqartariaqarlutillu. Tamaattumik suleqatigiinnermi Kalaallit Nunaanni nittartakkatigut saassussisoqarsinnaaneranut suliniutit annertusarneqassapput. Tassunga tunngatillugu CFCS ingerlaavartumik Kalaallit Nunaanni Naalagaaffimmilu nittartakkatigut saassusisinnaasut nalilersorneqarneri Kalaallit Nunaannut anngunneqartalissapput.

Sukumiinerusumik paasisaqarusukkuit Naalakkersuisumut allatsi Angutinnguaq Tittussen attavigisinnaavat, oqarasuaat 345604 imaluunnit mail: angu@nanoq.gl

Center for Cybersikkerhed-mi pisortaq Thomas Flarup Danmarkimi Naalagaaffiup isertortumik paasiniaasarfianut attuumassusillit, oqarasuaat +45 2016 0593