Nunarsuarmi plastikkinik mingutsitsineq unitsinniarlugu suliniutinut Kalaallit Nunaat siuttooqataassaaq

Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund ilisimatitsivoq, Kalaallit Nunaat High ambition coalition to end plastic pollution-imut ilannguttoq. Plastikkinik mingutsitsinermut akiuiniarneq pillugu nunarsuarmi isumaqatigiissusiaasussap sapinngisamik pimoorussiffiunissaa suleqatigiinnit sulissutigineqassaaq.

Suleqatigiit FN-imi plastikkit pillugit isumaqatigiissummik, nunarsuarmut pituttuiffiusussamik, 2040 nallertinnagu plastikkit ajornartorsiutaanerinik aaqqiinissamik siunertaqarfiusumik suliaqartoqarnissaanik aalajangiinissaq tunngavigalugu pilersinneqarpoq. Nunat suleqatigiinnut, tuluttut ”High ambition coalition to end plastic pollution”-imut taaguuteqartunut ilaasut ilaatigut tassaapput Danmark, Norge, Sverige, Finland aamma Rwanda.

Naalakkersuisuni nunatsinni plastikkinik mingutsitsineq annikillisarniarlugu oqaluuserisassamik pingaartitsiffiusumik suliaqarpugut. Ilaalernitsigut Kalaallit Nunaata plastikkinik mingutsitsinermut akiuiniarluni suliniuteqarnermi siuttooqataanissaanut nukittuumik oqariartuuteqassaagut. Plastikkit pinngortitamut pisartut avatangiisitsinnut peqqissutsitsinnullu sunniuteqarnerluttarput. Qularinngilarput, ilaatigut plastikkinik tunisassiortarneq aamma kemikaliani plastikkinik atuisarneq pillugu nunarsuarmi isumaqatigiissuteqartoqarnissaa Kalaallit Nunaanni avatangiisinut inuillu peqqissusaannut iluaqutaassasoq, Nunalerinermut, Imminut Pilersornermut, Nukissiornermut Avatangiisinullu Naalakkersuisoq Kalistat Lund oqarpoq.

Naalakkersuisut nunatsinni plastikkinik mingutsitsineq annikillisarniarlugu suliniutinik arlalinnik ingerlataqareerput, taakkununngalu aalisarnermut, piniarnermut aallaaniarnermullu atortunut annaasanut suliniuteqarnissamut pilersaarut, pinngortitami plastikkit ikinnerulersinniarlugit suliniutissanut pilersaarutaasoq, kiisalu plastikkit pillugit nalunaarut, 1. novembari 2022 aallarnerfigalugu plastikkinik ataasiaannarluni atugassatut tunisassiarineqartunik, soorlu milluaatinik, vatpindinik nerinermullu atortunik ataasiaannarluni atugassanik inerteqquteqarfiusoq ilaatinneqarput.

Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersiusoqarfimmi pisortaaneq Natuk Lund Olsen tlf.: 34 64 76-mut imaluunniit e-mailit: natl@nanoq.gl eller pan@nanoq.gl aqqutigalugit attaveqarfigineqassaaq.