Joint Committeemi ataatsimiinnerni USA-p Kalaallit Nunaata akornanni niueqatigiinnermut periarfissat ukkatarilerpaat

Naalakkersuisunit amerikamiullu naalakkersuisuisa sinniisui Mainemi USA-miittumi oktoberip 18-ani Joint Commiteemi ataatsimiipput.

Ukiut tamaasa Joint Committeemi ataatsimiinnerit ingerlanneqartarput tassanilu USA-p Kalaallit Nunaatalu ilisimatusarnikkut, ilinniartitaanikkut, aatsitassatigut, nukissiuuteqarnikkut, avatangiisinut niuernermut aningaasaliisarnermullu teknikkikkut suleqatigiinnerit ingerlaartut killiffii nalilersorneqartarput.

Ukioq manna ataatsimiinneq nunarsuatsinni najummassimanartorsiorfimmi isumannartumilu inissisimanermit sunnerneqarpoq, assigiinngisitaartunillu pilersuinissamut periarfissat niuernerullu qulakkeernissaat pisariaqartinneqarneranut annertusaasuulluni.

Royal Arctic Linep, Royal Greenlandip, Eimskipip aammalu Naalakkersuisut sinniisaat, amerikamiut naalakkersuisui, Maine International Trade Center aammalu kongresimi ilaasortaq Chellie Pingreep peqataaffigisaannik maannakkut siunissamilu Kalaallit Nunaata USA-llu akornanni niueqatigiinnissamut aporfiusinnaasut periarfissallu immikkut ukkataralugit eqqartuiffigineqarput.

Kinguneqarluarnissamik siunertalimmik paasisaqarfiusumillu oqaloqatigiittoqarpoq, tassanilu USA-p Kalaallit Nunaatalu akornanni toqqaannartumik niueqatigiissinnaanissamik pisariaqartitsineq aningaasaqarnermut ineriartornermut assigiinngisitaartitsinermullu taamaallaat tunnganani aammali maanna pilersuineq isumannaatsuunissamut tunngatinneqarpoq.

Oqaloqatigiinnermi niuernermi suleqatigiinnermi aporfiit arlallit tikkuarneqarput, aammattaarlu siumut isigaluni aaqqiissutaasinnaasunik siunnersuuteqartoqarpoq, taakkulu ukiut tulliuttut ingerlaneranni suliarineri ingerlateqqinneqassasut isumaqatigiissutigineqarpoq.

Oqaloqatigiinnerit saniatigut suliffeqarfinnut pulaarnissat aaqqissuunneqarsimapput, Mainemilu suliffeqarfiit kattuffiillu arlallit pulaarneqarlutik.

Joint Commiteemi ataatsimiinnermi, ukiigatta USAID-p Naalakkersuisullu akornanni isumaqatigiissutaasoq pillugu tekniskiusumik ilassummik isumaqatigiissuteqartoqarpoq, taamaalillunilu aningaasaliissutaasut 1,5 mio. USD-nik ilaneqarlutik.  
Ataatsimoorluni Oqaaseqaat atuarneqarsinnaavoq uani, tuluttut uani

Apeqqutit isiin@nanoq.gl mut nassiunneqarsinnaapput