AtuartigukKitaata avannaani kapisilinniarneq unitsinneqassaaq
Nassiussisuuvoq: Aalisarnermut Piniarnermullu Naalakkersuisoqarfik
Aqutsiveqarfimmi kitaata avannaani inuussutissarsiutigalugu aalisartut kapisilinniarnerat oktobarip 19-ianni 2022-mi unitsinneqassaaq.
Kalaallit Nunaanni Aalisarsinnaanermut Akuersissutinik Nakkutilliisoqarfik nalunaaruteqarpoq aqutsiveqarfimmi kitaata avannaani inuussutissarsiutigalugu aalisartunut kapisilinniarneq oktobarip 19-ianni 2022-mi unitsinneqassasoq, pisassiissutit nungunneqalermata.
Kapisilinnut qassutit tamarmik aqutsiveqarfimmi pineqartumi kingusinnerpaamik ullormi aalisarnerup unitsinneqarfiani qaqinneqariissapput nalunaaqutaq 23.59 nallertinnagu.
KANUAANA aammaarluni kaammattuivoq aalisartut pisatik piaarnerpaamik nalunaarutigisassagaat. Erseqqissaatigineqassaaq akuersissuteqartoq aalisariarsimanngikkaluarluni pisaqarsimanngikkaluarluniluunniit aamma nalunaaruteqartussaammat. Decembarip 2-anni 2022-mi kingusinnerpaamik nalunaaruteqartoqassaaq. Decembarip 2-anni 2022-mi kingusinnerpaamik nalunaaruteqartoqanngippat, 2023-mi kapisilinniarsinnaanermut akuersissummik tunineqartoqarsinnaanngilaq.
Kapisilittat pillugit paasissutissat amerlanerusut nittartakkami Sullissivik.gl-imi atuarneqarsinnaapput.
Annerusumik paasisaqarusukkuit attavigiuk Kalaallit Nunaanni Aalisarsinnaanermut Akuersissutinik Nakkutilliisoqarfik oqarasuaat 34 50 00 imaluunniit e-mail gflk@nanoq.gl