Kalaallit Nunaata Islandillu siunissami suleqatigiinnissamik nalunaarut isumaqatigiissutaat

Naalakkersuisut Siulittaasuat Múte B. Egede Islandillu Ministeriunerat Katrín Jakobsdóttir siunissami nunat taakku marluk akunnerminni suleqatigiinnissaminnut nalunaarummik Reykjavikimi ullumikkut atsioqatigiipput. Tassani Kalaallit Nunaata Islandillu illugiillutik attaveqaqatigiinnertik nukittorsarniarlugu ineriartortissallugulu naalakkersuisut illugillutik pisussaaffeqarnertik uppernarsarpaat.

“Ulluni makkunani najummassimanartorsiorfiusuni pingaaruteqarpoq unammilligassat aaqqiiviginiarlugit ikinngutinik suleqateqarluarnissaq. Ataatsimoorluta siunissaq ilusilersorsinnaavarput kalaallit islandimiullu innuttaasuinut iluaqutaasussamik. Suleqatigiinnissatsinnut siunissamullu qaamanerusumut isigisinnaalernerput uppernarsaratsigu nuannaarutigeqaara.”
- Naalakkersuisut Siulittaasuat Múte B. Egede

Ukiuni kingullerni marlunni Kalaallit Nunaata Islandillu illugiillutik suleqatigiinnerat annertuserujussuarpoq illugiinnut iluaqutaasumik. Nunat taakku marluk Atlantikup Avannaani Issittumilu ataatsimut arlalinnik soqutigisaqaqatigiillutillu periarfissaqarput. Aammattaarlu silap pissusaata allanngoriartorneranik aammalu avatangiisimik illersuiniarnermut assingusunik unammilligassaqarlutik.

Siunissami suleqatigiiffiusinnaasut pingaarnersiorneqartussat arfineq marluk nalunaarummi tikkuarneqarput: Niuerneq, aalisarneq, aningaasaqarnikkut suleqatigiinneq, naligiisitaaneq, ilinniartitaaneq ilisimatusarnerlu aammalu kulturikkut suleqatigiinneq. Taakkunani suleqatigiinneq naligiimmik pissarsiffiusoq anguneqassasoq siunnerfiulluni.

Naalakkersuisut Siulittaasuat Islandillu Ministeriunera ukioq allortarlugu Nuuk Reykjavikkilu nikittaallugit ataatsimiiffigisassavaat suliassatut pingaarnersiukkat ataasiakkaarlugit killiffissiorniarlugit.