Aalisarnerup ineriartortinnissaanut qinnuteqarit

Tunumi kujataanilu aalisarnerup suliniuteqarluni ineriartortinnissaanut qinnuteqartoqarsinnaavoq.

Naalakkersuisut aalajangerput aningaasanut 2022-mut inatsimmi kontomi 50.01.20-mi suliniutinut aningaasaliissutigineqarsimasunit sinneruttut atorlugit Tunumi Kujataanilu aalisarnerup ineriartortinneqarnissaanut tapiissutaasinnaasut.

Naalakkersuisut kissaatigaat Tunumi Kujataanilu aalisarnerup ineriartornera ukkatarineqassasoq, taamaammallu suleqatigiissitanik pilersitsisoqarpoq, taakkulu sumiiffinnut pineqartunut aalisarnerup  ineriartortinneqarnissaanut suliaqassapput.

Taamaattumik Aalisarnermut Piniarnermullu Naalakkersuisoq Tunumi Kujaanilu aalisartunut piniartunullu kaammattuuteqarpoq aalisarnerup ineriartortinnissaanut suliniuteqarniarlutik pilersaaruteqartut tapiissutinut qinnuteqaqqusilluni.

Aalisarneq ineriartortinniarlugu kikkut tamarmik suliniuteqarniarlutik pilersaaruteqartut tapiissutinut qinnuteqarsinnaapput. Aningaasat pikkorissaanernut, kursusinut, misileraalluni aalisarnernut assigisaannullu tapiissutaasinnaapput. Qinnuteqarninnut kommunit inuussutissarsiornermut siunnersortaannit ikiorneqarsinnaavutit imaluunniit KONFIFA-mit aamma ikiorneqarsinnaallutit.   

Aningaasat 2022-mi sinneruttut 149.000 koruuniupput. Suliniutigineqartoq pillugu allaaserisaq  aamma missingersuutitut siunnersuut Aalisarnermut Piniarnermullu Naalakkersuisoqarfimmut oktobarip 12-iat nallertinnagu nassiunneqassaaq.

Uunga:

apn@nanoq.gl
Imaneq 1A, 701
3900 Nuuk

Qinnuteqarfissap ullua nallerneqareerpat suliniutigineqartunut sapinngisaq tamaat naapertorlugu amerlanerpaanut tapiisoqassaaq.

Annerusumik paasisaqarusukkuit Aalisarnermut Piniarnermullu Naalakkersuisoqarfimmut apn@nanoq.gl-imut allassinnaavutit.