Aalisarnermut Piniarnermullu Naalakkersuisup KNAPK pakatsissutigaa

Aalisarnermut Piniarnermullu Naalakkersuisoqarfiup KNAPK-p tusagassiuutinut nalunaarutaa septembarip 25-anni 2022-imeersoq qulequtalik:; 2023-mut aningaasanut inatsisissatut siunnersuut piviusunngortikkusutanik imaqanngilaq aammalu sinerissap qanittuani aalisarnermut saassussineruvoq ersarissoq”., innersuussutigalugu erseqqissassaavaa KNAPK-p oqaatsit nipilu atugai kinguneqartussamik oqaloqatigiinnissamut tunngaviliinngitsut. KNAPK-p Aalisarnermut Piniarnermullu Naalakkersuisumik oqaloqateqartarnerup attaveqartarnerullu pitsanngortinnissaa kissaatigippagu tusagassiuutini saassussineq taanna aqqutissaanngilaq.

Aalisarnermut Piniarnermullu Naalakkersuisoq, Karl Tobiassenip tusagassiuutinut nalunaarut atuareerlugu paatsuungavoq pakatsillunilu. ”KNAPK-mik ingerlaavartumik oqaloqateqartarpunga ataatsimeeqateqartarlungalu, tamannalu tunngavigalugu atorfillit tunuanni toqqortortunga tunuliaqutinnullu akerliusumik ilinniorninnik oqaaseqaateqarnera ilisarisinnaanagu. Sineriak tamaat angalaffiginikuuara tassanilu KNAPK-p Upernavimmit Nanortalimmut immikkoortortaqarfii najukkanilu aalisartut oqaloqatiginikuullugit”, Karl Tobiassen oqarpoq.

Aalisarnermut Piniarnermullu Naalakkersuisoqarfiup tamassuma saniatigut KNAPK juunip qaammataani ataatsimeeqatigaa tamassumalu kinguninngua Naalak¬kersui-soqarfiup KNAPK-llu akornanni oqaloqatigiittarneq attaveqaqatigiinnerlu annertu-sarniarlugit aalajangersimasumik ataatsimiittarnissat allakkatigut siunnersuutigi-nikuullugu. Siunnersuutigineqarpoq KNAPK-mi siullemeerluni ataatsimiittoqassasoq.

Taamaammat imminut mattulluni toqqortorneraaneq – KNAPK-milluunniit oqaloqateqarusunnginneq - Naalakkersuisup Naalakkersuisoqarfiulluunniit ilisarisinnaanngilaat.

Naalakkersuisup aammaarluni erseqqissassavaa Naalakkersuisut akit pillugit isumaqatigiinniarnernut akinilluunniit aalajangersaasarnernut akuliunneq ajortut. ”Tamanna kattuffiit tunisassiortullu akisussaaffigaat. Taamaammat KNAPK ilaatigut Royal Greenlandimut tunisinermi akit pillugit isumatigiinniartussaavoq. Tamannami KNAPK-p pingaarnertut suliassaraa.” Karl Tobiassen oqarpoq.

Naalakkersuisut tamassuma saniatigut Ukrainemi sorsunnermut atatillugu akit qaffakkiartornerisa Kalaallit Nunaanni tamarmi innuttaasunut eqquisut iliuuseqarfiginissaat suinertaralugu siunnersuummik Inatsisartunut saqqummiipput. ”Naalakkersuisut aningaasat naleerukkiartornerinut akillu ineriartornerannut tunngatillugu pissutsit ingerlaavartumik nakkutigaat, aammalu Polaroilip akit pillugit isumaqatigiissutaa 2023-p naanerani atorunnaarpat ikummatissat akii qaffarujussuassagaluarpata  pissutsit nalilersorneqartariaqarput,” Karl Tobiassen oqarpoq.

Aalisarnermut Piniarnermullu Naalakkersuisoqarfiup Aalisartunut Piniartunullu Siunnersuisoqarfimmik (KONFIFA) aaqqissuusseqqinnissamik 2023-mut Aningaasanut inatsisissatut siunnersuummut atatillugu siunnersuut pillugu oqaloqatigiittoqarsimannginneranik attaveqaqatigiittoqarsimannginneranilluunniit oqaaseqartoqarnera pillugu sakkortunerpaamik tunuartissavaa. KNAPK sapaatit akunnerisa 38-anni ataatsimiinnissamut aggersarneqarpoq, tassani Aningaasanut inatsisissatut siunnersuut allannguutissatullu siunnersuut saqqummiunneqarput.

Aamma naqqiutigisariaqarpoq KONFIFA sipaarniutigineqarnianngitsoq. Aalisarnermut Piniarnermullu Naalakkersuisoqarfik Aningaasanut inatsisissatut siunnersuut aqqutigalugu siunnersuuteqarpoq KONFIFA Naalakkersuisoqarfimmut uterteqqinneqassasoq. Tamaaliornikkut aningaasanut inatsimmi konto 51.01.07atorunnaassaaq aningaasallu ilaat Naalakkersuisoqarfimmut KONFIFA-p suliassaanik siunissami suliarinnittartussamut nooqqinneqassallutik. Ilumoorpoq Naalakkersuisoqarfiup taamatut aaqqissuusseqqinnermi aningaasat ikinnerusut atorlugit suliassat suliarineqartarnissaat ilimagigaa, tassa Naalakkersuisoqarfik sulereersunik amerlanernik atuisinnaammat

Naalakkersuisoqarfik Siunnersuisoqarfiup suliassaani anguniagaanilu angusassat pillugit KNAPK-mut ukiut tamaasa isumaqatigiinniartarpoq, tassunga ilanngullugit sulisut akissarsiaannut aningaasat. Naalakkersuisoqarfik KONFIFA-p suliassaanik suliarinninnermut atatillugu sulisorisani tamaasa atorsinnaammagit ilimagineqarpoq atorfik ataasiinnaq nuunneqassasoq. Tamannali suliassat ikilinerannik kinguneqanngilluinnassaaq.

Siunnersuisoqarfiup Naalakkersuisoqarfimmut nooqqinneqarnissaanik Naalakkersuisut siunnersuuteqarnerannut tunngaviusut arlaliupput, Aningaasat ikinnerusut atorlugit sulisut amerlanerusut atorlugit suliassanik suliarinnittarnermut sinerissap qanittuani aalisarnerup pitsaanerusumik ineriartortinnissaanik qulakkeerinninnissamut tunngatillugu. Tamanna nunatsinni pisuussutinik uumasunik atuinerup tapersernissaanut KNAPK-mit ujartorneqartumut aningaasartuutinik allaanerusumik tulleriinnilersuinerunnginnerpoq?

Aalisarnermut Piniarnermullu Naalakkersuisumut aalisarnermi kattuffinnit allanit aalisartunut piniartunullu siunnersuisoqarfiup kattuffimmit ataatsimit ingerlanneqartariaqannginneranik kisiannili sumulluunniit attuumassuteqannginnissaanik isumaqartunit saaffiginninnerit pissutigalugit, tamanna sulisassat allanngortinnerannut tunngaviorpiarpoq.

”KNAPK sakkortuumik kaammattussavara, sinerissap qanittuani aalisarnerup ineriartortinneqarnera pillugu Aalisarnermut Piniarnermullu Naalakkersuisoqarfimmut uannullu tunngavilersukkamik kinguneqartussamillu oqaloqateqartaqqullugu – tusagassiuutitigut saassussinerit aqqutiginagit. Taamaatut iliorneq inuussutissarsiutitta pingaarnersaat piffissamut sivisuumut qulakkiissagutsigu kissaatigisatsitut – pisariaqartitatsigullu oqaloqatigiinnissamut tunngavissiinngilaq. Taamaammat naapilluta oqaloqatigiitttarnitta ingerlateqqinnissaanut qilanaarpunga – neriuppungalu KNAPK tamassumunnga isumaqataassasoq”, Karl Tobiassen, Aalisarnermut Piniarnermullu Naalakkersuisoq naggasiivoq.

Sukumiinerusumik paasisaqarusukkaanni immikkoortortaqarfimmi pisortaq Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl