Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen, Norgemi Tromsø pulaarpaa

Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen, sapaatip akunnera 37-mi Norgep avannaani illoqarfik annerpaaq Tromsø tikeraarpaa.

Tikeraarnermini suleqataasut attuumassutillit universitetssygehus UNN (napparsimmavissuaq), nakorsat, Statens Barnehus (Meeqqat inuusuttullu pillugit piginnaanngorsarfik), Urfolksprojektet i Alternativ til Vold (nunap inoqqaavisa nakuuserfigineqartarnerannut suliniuteqarfik) inuilllu allat attuumassutillit ataatsimeeqatigai. Paaqqinnittarfiit inuillu ataatsimeeqatigisat annertuumik inoroorsaarput aamma peqqissutsikkut - inunnillu isumaginninnikkut, naak silamik ungasissumiillu unammilligassaqaraluarlutik, pitsaanerpaamik innuttaasunik sullissinissaq qulakkeerumallugu suliniutit amerlasuut pillugit ilisimatitsipput.

Mimi Karlsen Tromsømi tikeraarnermini ima ilisimatitsivoq:

“Inunnik isumaginninnikkut - aamma peqqissutsikkut suliarisimasannik Tromsø unammilligassanik amerlasuunik sanillersuunneqarsinnaavoq. Illoqarfik avannarpasissumiippoq illoqarfimmullu pingaarnersamut ungasissumik inissisimaffeqarluni. Avinngarusimasunik inuiaqatigiinnik arlalinnik assigiinngitsunik innuttaqarpoq, nunallu inoqqaavi, Saamit aamma innuttaralugit. Taamaattumik aamma Nunatsinni unammilligassat nalaattakkavut iliuuseqarfiginissaannut isumassarsiorfittut naleqquppoq. Norge nunaavoq siuarsimasoq, taamaattumillu suliniutinut pitsaasumik kinguneqarsimasunut assersuutaalluarsinnaalluni.

Universitetshospitalet UNN-imi aqutsisut ataatsimeeqatiginerani innuttaasut illoqarfimmut ungasissumi najugaqartut, qarasaasiaq atorlugu katsorsartinneqarlutillu pinaveersaartitsinermik suliniuteqarnikkut suliaqartut pillugit ilaatigut ilisimatinneqarpunga.

Familievernskontoret ataatsimeeqatiginerani aappariit meerartallit qimanniarlutik aalajangersimappata pinngitsooratik akerleriissuteqarnermi isumaqatigiissitsiniartartumik oqaloqateqartassasut tusarpara. Urfolksprojektemillu ataatsimeeqateqarninni saamit ilaqutariit, inukitsuni avinngarusimasuni najugaqarajuttut, persuttaanermik nalaataqartunut katsorsartinnissamut neqeroorutaat pillugit tusarpakka."

"Nunatsinni piffissami qanittumi meeqqanut illut pingasut, Tasiilami, Maniitsumi aamma Ilulissani ammassavagut, taakkunani meeqqat kinguaassiutitigut atornerlunneqarsimasut nakuuserfigineqarsimasullu, toqqissisimanartumi apersorneqarsinnaapput ikiorserneqarlutillu. Soorunami taamaattumik Tromsø-mi meeqqat illuannik assingusumik pulaarnissaq aamma tulluarsimavoq. Ukiuni arlalinni suleriusertik ineriartortissimavaat uannullu isumassarsiorfiusimavoq pitsaasoq. Ulloq kingulleq Tromsø-mi peqatigiiffik “Helt med!” ataatsimeeqatigaara. Peqatigiiffiup innarluutillit aalajangersimasumik sulisinnaanerannik tapersersuinissaq siunertaraa. Taakkua saniatigut Norge tamaat suliffiit attuumassuteqarsinnaasut assigiinngitsut nittartakkatigut siammartertarpaat inuussutissarsiortunillu ataavartumik attaveqartarlutik. Tamanna assut tupigusuutigaara. Ataatsimiinnermi inuit marluk innarluutillit peqataapput, oqaluttuarpullu Helt med! suliffissarsiornerminni maannamullu qanoq ikiuisimanerannik,” taama nangilluni oqaluttuarpoq Naalakkersuisoq Mimi Karlsen.

Pulaarnermi paasisat attuumassuteqarsinnaasut piffissami qanittumi allaffissornermi suliniutit assigiinngitsut suliarineqalerpata ilanngunneqassapputtaaq.

Attaveqaat, naalakkersuisup allattaa Tuperna Kristensen, tukr@nanoq.gl