Nunalerinermik inuussutissarsiuteqartunut aningaasatigut immikkut ittumik tapiissutit

Aningaasaqarnermut Akileraartarnermullu Ataatsimiititaliaq Naalakkersuisut inassuteqarnerat tunngavigalugu aalajangerpoq, nunalerinermik inuussutissarsiuteqartunut aningaasalersuinermut immikkut ittumik tapiissutit 2022-mi 5 mio. koruuninik amerliniarlugit. Aningaasalersuinermut immikkut ittumik tapiissutit qaffannerisigut, inuussutissarsiortut ajornartoornermi, naggorissaatissat nerukkaatissallu akitsorujussuarnerinik peqquteqartumi pitsaanerpaamik aniguinissaat qulakkeerneqassaaq.

• Piffissaq artorsarfiugaluartoq nunalerisunut aningaasalersuinermut tapiissutit qaffanneqarnerat pitsaasuuvoq. Qaffaanikkut nunalerisut ajornartoornermi pitsaanerpaamik aniguinissaat qulakkiissavarput. Siunissami assingusumik pisoqarnissaa pinngitsoorniarlugu, Naalakkersuisut nunalerinermik inuussutissarsiuteqartut qanittumik suleqatigalugit suliassaqarfinnut taakkununnga aningaasartuutit appartinneqarnissaat sulissutiginiarpaat. Tamanna narsaatini naatsitsisarnerup pitsaanerulersinneqarneratigut alliliinikkullu ukiuunerani nerukkaatissanik najukkami naatitsisarnerit annertusinerisigut pissaaq. Tamatuma saniatigut arlallit innaallagissiorfimminnik dieselitortunik erngup nukinganik innaallagissiorfeeqqanik seqernullu qinngornera atorlugu innaallagissiorfinnik taarsiinissaat qulakkiissavarput, dieselimut aningaasartuutit nunalerisut aningaasartuuteqarfiginerpaasaasa pingajuattut inissisimammata, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

COVID-19-ip ajornartoortitsinera, tamatumalu kingorna Ukrainemi sorsunnerup aallartinnera peqqutaallutik nunalerisunut nerukkaatissat naggorissaatissallu akii qaffariarujussuarput. Taakku kingunerisaannik nunalerisut nerukkaatissanut naggorissaatissanullu aningaasartuutaat 2021-mut sanilliullutik 4,8 mio. koruuninik qaffapput, tassalu qaffaat 37%-iulluni. Aningaasartuutinit tamarmiusunit nerukkaatissanut naggorissaatissanullu aningaasartuutit 50 %-iusarmata, aningaasartuutit qaffaataat nunalerisut aningaasaqarnerannut tamarmiusumut sunniuteqangaatsiarput.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup Savaatillit Peqatigiit Suleqatigiissut aamma Nunalerinermut Siunnersorteqarfik suleqatigalugit qinnuteqaammik suliaqarluni aallartinniarpoq. Qinnuteqaateqarluni suliaq taanna inissippat nunalerisut ilisimatinneqassapput.

Nunalerisunut ataasiakkaanut tapiissutit aningaasaliissutinut qinnuteqartoqareerneratigut, aammalu nersutinik toqoraaffimmiit savat nersussuillu tunisat kisitsisitaat pisortatigoortut tunngavigalugit akilerneqassapput.

Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaagallartoq Karen Anne Arleth tlf.: 345465/551585 imaluunniit e-mail: knar@nanoq.gl imaluunniit pan@nanoq.gl aqqutigalugit attaveqarfigineqassaaq.