Piniarneq pillugu Siunnersuisoqatigiit 22.-23. september 2022-mi ataatsimiinneraniit tusagassiorfinnut nalunaarutaat

Piniarneq pillugu Siunnersuisoqatigiit (PPS) 22.-23. september 2022-mi Nuummi ataatsimiipput ukuninngalu oqaaseqaateqarluni:

Piniakkat killilersukkat pillugit:

• Qilalugarniarnermut tunngasut:

2023-imiit 2026-imut qernertartassat ikiliartortinneqarnissaat allaat affaannanngortinnissaat tusarniutaasumi siunnersuutaavoq. Tamanna PPS-imiit isumaqatigineqanngilluinnarpoq. PPS-imiit piumasarineqarpoq qernertanik pisassiissutaasartut ikilisinneqassanngitsut qernertat ikiliartoratik amerliartortut atuisuniit ersarissumik oqariartuutigineqartuarmat. Ilanngullugu PPS-imiit piumasarineqarpoq qernertartassanik pisassiisarneq pillugu tusaarniaareernerup kingornatigut KNAPK-mut isumaqatigiinniartarnissaq eqqunneqassasoq.

2023-miit qernertartassat inassuteqaammi tusarniutaasumi siunnersuutaavoq aqutsiveqarfinni Sisimiuniit aqutsiveqarfik Nanortalik ilanngullugu qernertarniarneq unitsinneqassasoq.
PPS-ip kissaatigaa Qeqqata Kommunea qernertanik pisassaqaannartariaqartoq qilalukkat amerliartuinnartut maluginiarneqarmat. Aammalu Kommune Kujalliup qilalukkat qernertat qaqutigut takkuttartut pisarineqartarsinnaaneri kissaatigalugu.

PPS-ip Tunumi qaqortat akuttugaluartumik takkusimaartillugit pisarineqarsinnaanissaat neqissaqarniarneq eqqarsaatigalugu kissaatigaat. Taamaattumillu Naalakkersuisut kajumissaarlugit Tunumi qaqortartasseeqqullugit.

Kitaanut tunngatillugu PPS-ip qaqortartassat paggatassiissutigineqartarneri 2022-mituulli ingerlaannarnissaat kissaatigineqarpoq.

• Aaverniarnermut tunngasut:

PPS-ip nuannaarutigaa kiisami aarrit ukioq kaajallallugu piniarneqartalernissaannut tunngasoq naammassilermat, aammalu aaffanniarnermi aqutsinermut tunngasut allaat oqiliallatsinniarneqarmata, soorlu ilaatigut arnavissat nukallullu Qaanaami pisarinissaanut periarfissaareersup saniatigut Tunumi pisarineqarsinnaanngussammata, nalunaarut Naalakkersuisunit akuersissutigineqariarpat.

• Piniartut atuisullu ilisimasaannik katersineq atuinerlu

PPS-ip nuannaarutigaa Naalakkersuisut sulissutigimmassuk piniartut atuisullu ilisimasaasa aaqqissuussaasumik katersorneqartalernissaat siunertaralugu nalunaarummik sinaakkusiisussamik suliaqartoqarnera. Kajumissaarutigalugulu suliaq 2019-imi qilalukkat allallu piniakkat killilersukkat pillugit Tunumi piniartut atuisullu ilisimasaannik katersinerup aallartinneqarsimasup annertusisamik ingerlateqqinneqarnissaa, Kitaa ilanngullugu.

Taamaaliornikkut aalajangiisartut aalajangiiniarneranni tunuliaqutissanik aaqqissuussaasumik katersineq annertusarneqassammat ilisimatuut ilisimasaat inassuteqaataallu kisiisa tunngavigiunnaarlugit piniartut atuisullu ilisimasaat tunngavilersuilluassammata. Tamatumali PPS-ip tungaaniit suleqataaffigineqarnissaa soqutigineqarluartoq erseqqissaatigineqarpoq.

Killilersuisoqartillugu pingaarnersiusoqartariaqarpoq
Piniakkanut killilersukkanut tamanut, amerlassusiliilluni pisassiissutigineqartartunut inuussutissarsiutigalugu allagartallit kisimik piniarsinnaatitaalernissaat Naalakkersuisut atuutsittariaqaleraat KNAPK-mi aallartitaasa oqariartuutigaat.

Kommunet PPS-imi ilaasortaatitaasa erseqqissaatigaat KNAPK-miit oqariartuut, assersuutigalugu qilalukkanut tunngatillugu piffiit ilaanni qilalukkat qaqutiguinnaq takkuttarfiini imminut pilersorsinnaaneq ileqqutoqqat ilarisaat ataqqillugu pingaartillugulu sunngiffimmi piniarsinnaanermik allagartallit periarfissaqartittarnissaat oqariartuutigalugu.

Tunumi Kujataanilu immikkut inuussutissarsiornerup inerisarnissaanut suliniutit
PPS-ip nuannaarutigaa Naalakkersuisut kommunet susassaqartullu allat peqatigalugit suleqatigiissitaliortoqarsimammat Tunumi Kujataanilu inuussutissarsiutinik inerisaanissamut tunngasunik suliaqartussanik.

Piniarneq aallaaniarnerlu pillugit inatsit
Naggataagut PPS-ip Inatsisartunut Naalakkersuisunullu kajumissaarutigaat piniarneq aallaaniarnerlu pillugit inatsisip Ukiakkut Inatsisartuni ataatsimiinnerup nalaani naammassillugu suliarineqarnissaa. Tunngavilersuutigineqarporlu inatsisip akuerineqareernerata kingorna nalunaarutit arlalissuit nutarsaqqinneqartussaammata, piniakkanik aqutsinermut sinaakkusiisussat. PPS-ip tungaaniit suliap naammassineqarnissaa qilanaarineqarpoq ukiuni arlaqalersuni missingersuut peqqissaartumik suliarineqareermat.

Inussiarnersumik inuulluaqqusillunga

Piniarneq pillugu Siunnersuisoqatigiinni Siulittaasoq

Henning Dalager