AtuartigukKNAPK-p pasilliuteqarnera eqqortuunngillat
Nassiussisuuvoq: Aalisarnermut Piniarnermullu Naalakkersuisoqarfik
KNAPK-p tusagssiorfitsigut septembarip 25-anni 2022 saqqummiussaanut atatillugu
Aalisarnermut Piniarnermullu Naalakkersuisoqarfiup sakkortunerpaamik KNAPK-p NAFO-imi (Northwest Atlantic Fisheries Organization) alaatsinaatsutut peqataa-salerumalluni kissaateqarsimaneranut illua’tungiliisimaneraaneranut pasilliutai eqqartuunngimmata oqaatigineqassaaq.
Taamaattoq Aalisarnermut Piniarnermut Naalakkersuisoqarfik sapinngsani tamaat pitsaasumik KNAPK NAFO-imi alaatsinaatsutut peqataasalerusulluni kissaateqarneranut atatillugu maleruagassat aamma suleriaatsit pillugit ilitsersorluarsimavaa aamma NAFO-mi ukiumoortumik ataatsimiittarnerni suliat suut pillugit suliaqartoqartarneranut ilanngullugu. KNAPK-p NAFO-mi alaatsinaatsutut peqataasalerusulluni qinnuteqaataanut taasititsinermi tapersiisimalluta. Taakkua saniatigut Naalakkersuisoqarfiup Kalaallit Nunaata ukiumoortumik ataatsimiinnissamut aallartitaanut ilanngullugit KNAPK aggersarsimalluguttaaq, Kattuffik ukiumoortumik ataatsimiinnissami alaatsinaatsitatut peqataasalernissaminnut qinnuteqaatertik piffissaagallartillugu qinnuteqaateqar-simannginnerat peqqutigalugu.
NAFO-p ukiumoortumik ataatsimiinnissaanut alaatsinaatsutut peqataassalluni qinnutigineqarnissaanut maleruagassat malillugu ataatsimiinnissaq tulleq sioqqullugu ullut 100-t nallertinnagit qinnuteqaatigineqareersimasussaapput. KNAPK-p piffissaritaq taanna naammassisinnaasimanngilaat taamaammallu NAFO-p ukiumoortumik ataatsi-miinnissaani alaatsinaatsutut aatsaat 2023-imi peqataasinnaammata. Naalakkersui-soqarfiup KNAPK ukioq manna ukiumoortumik ataatsimiinnissamut Nunatta aallartitaannut peqataasussatut aggersarsimanngikkaluarpagit, peqataasinnaasimas-sanngikkaluarput.
Taakkua saniatigut Naalakkersuisoqarfiup erseqqissassavaa soorluttaaq KNAPK tamanna pillugu ilisimatinneqareersimasoq, NAFO-imi ukiumoortumik ataatsimiinneri, suleqatigiisitani sulineri allallu taamaallaat siunnersuinernik, pisassiissutissatut siunnersuusiornissamut taggiinerni immani avataani aalisarnerni aamma nakkutilliinerni, nunat tamat imartaanni aalisarfinni NAFO-p isumaqatigiissusiorneqarfiata iluaniittuni pisut taamatullu inatsisitigut akisussaaffigisaani pillugit suliat sammineqartarmata. Akisussaaffinni taakkunani Nunarput NAFO-p imartaani 3L aamma 3M-imi raajanik aalisarsinnaanera ammatinneqarpoq, Grand Bank aamma Flemish Cap raajanik aalisarsinnaanera maannakkumut matoqqatinneqartoq. NAFO-imi nunat namminneq inatsisitigut akisussaaffigisaasa iluini aalisarnerit sammisanngilaat. Paasissutissiissutigineqarsinnaavoq Nunatta NAFO-imi ilisimatusaatitagalugu ataatsimiititaliaanut akiliuteqartarmat taakkua qaleralinnut aamma raajanut nunatta kitaata sineriaani siunnersuusiortarneri peqqutigalugit, aalisarnerilli taakkua NAFO-p ukiumoortumik ataatsimiinneranni eqqartorneqartaratik.
Taamaammat KNAPK-p NAFO-imi alaatsinaatsutut peqataasalerniarnerminnut suliartik paatsoorsimassavaat. KNAPK suli ilitsersorneqarnissaminnik pisariaqartitsissaguni Naalakkersuisoqarfimmut tamanna pillugu saaffiginnissuteqaqqissinnaanissaannut tikilluaqquneqarput, taamaattorli tusagassiorfiit avaqqullugit tamanna pisinnaappat kissaatiginarluni.
Naalakkersuisoqarfiup erseqqissassavaattaaq Qallunaat Nunaata Nunatta NAFO-imi soqutigisai suliarisinngimmagit. Aallartitani Qallunaat Nunaat peqataatitaqarneq ajorpoq taamaallaallu Nunarput Savalimmiullu.
Sukumiinerusumik paasisaqarusukkaanni immikkoortortaqarfimmi pisortaq Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl