Ingerlatseqatigiiffiit Kalaallit Nunaanni erngup nukinganut atorneqanngitsumut aningaasaleerusuttut arlaliupput

Ingerlatseqatigiiffiit arlallit Kalaallit Nunaanni erngup nukinganut isumalluutit annersaannik atuinissaq pillugu unammilleqatiginnermut peqataanissamut soqutiginninnerminnik takutitsipput.

Ukioq manna maajimi Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund nalunaaruteqarpoq, ingerlatseqatigiiffiit Kalaallit Nunaanni Tasersiami aamma Tarsartuup Tasersuani erngup nukinganut isumalluutit annertuut atorneqarnissaannut neqerooruteqarnissamut Kalaallit Nunaanniit pileritsatsinnissaat kissaatigineqartoq.

Ingerlatseqatigiiffiit erngup nukinganut innaallagissiorfippiamut aammalu suliffeqarfissuarmut ataatsimut amerlanerusunulluunniit, erngup nukinganik innaallagissiorfimmiit innaallagissamik silap pissusianut mingutsitsinngitsumik atuisinnaasunut aningaasaliinissamut piareersimassapput.

Ingerlatseqatigiiffiit isumalluutinik atuinissamut pisinnaatitaaffeqalernissaq unammillissutigissavaat. Unammilleqatigiissitsinermi Kalaallit Nunaata aningaasaliisussamut, suliassamik pitsaanerpaamik saqqummiussisumut, aammalu Kalaallit Nunaannut pitsaanerpaamik isumaqatigiissuteqarfiusussamut isumaqatigiissuteqarnissaa anguneqassaaq.

• –Taamaalluni ingerlatseqatigiiffimmik erngup nukinganut isumalluutitsinnik annertuunik atuisikkusutatsinnik toqqaasussanngorutta aalajangernissaq annertuujussaaq. Taamaattumik eqqortumik torersumillu sulinissarput pingaaruteqarpoq. Aalajangernerput siunissami ukiorpassuarni atugarisinnaasussaavarput, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Toqqaaniarnermi suliassarpiaat aatsaat 2023-p qiteqqunneraniit aallartissapput aammalu 2024 ilanngullugu ingerlassallutik. Suliassaq oqaloqatigiinnernik tunngaveqarluni unammisitsinertut ingerlanneqassaaq, tassanilu ingerlatseqatigiiffiit tamarmik naapertuuttumik ersarissumillu pineqassapput naliliiffigineqartassallutillu.

Namminersorlutik Oqartussat najoqqutassanik inaarutaasunik, ingerlatseqatigiiffiit neqeroorusiornerminni tunngavissaannik suliaqassaaq. Namminersorlutik Oqartussat qaammatini makkunani neqerooruteqarnissamut najoqqutassat pitsanngorsarniarlugit niuerfimmi oqaloqatiginninnernik, aningaasaleerusussinnaasut paasinniffigisinnaasaannik ingerlatsipput.

Namminersorlutik Oqartussat ingerlatseqatigiiffinnik, niuerfimmi oqaloqatiginninnermut peqataanissamik pimoorussisunik arlalinnik naammattoorsipput.

• Maannarpiaq neqerooruteqarnissamut najoqqutassanik pitsaasunik paasiuminartunillu suliaqarnissamut piareersarpugut. Tassunga ilagitillugu ingerlatseqatigiiffiit soqutiginnittut assigiinngitsut oqaloqatigaagut, taamaalilluta suut taakkununnga pilerinarnersut atorumaneqannginnersullu ilisimalissavagut. Maannarpiaq suliassanut siunnersuutit pimoorussiffiusut soqutiginniffiusullu, niuerfimmi oqaloqateqarnitsinnut peqataatinneqartut arlallit pigigatsigit nuannaarutigaara, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
• Kisiannili maannarpiaq arlaannaanulluunniit isumalluutinik atuinissamut pisinnaatitaaffimmik suli pissarsisoqanngilaq akuersisoqarsinnaananiluunniit. Tamanna aatsaat 2024-mi unammilleqatigiissitsilluni neqerooruteqartitsinermi ajugaasoq toqqarneqarpat pissaaq. Maannarpiaq akuersissutit tunniussagut taamaallaat misissueqqaarnissamut tunngasuupput, taakkulu tamatigut kisermaassisinnaatitaaffiusanngillat, Naalakkersuisoq Kalistat Lund ilassusiivoq.

Tamatuma kingorna unammilleqatigiissitsilluni neqerooruteqartitsinermi ajugaasup suliap isumannaanneranut uppernarsagaalluarneranullu uppernarsaaffiusumik misissuinermut ukiut marluk pingasullu missaat atussavai. Ajugaasup suliamik uppernarsaanissani iluatsinngippagu, Kalaallit Nunaanniit suliaq taanna ingerlateqqinneqassanngilaq, taamaalillunilu suliassamik nutaamik ujartuisoqassaaq.

Nittartakkami unammilleqatigiissitsinermut tunngasut takukkit, uani

Attaveqarfissaq

Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq Mette Skarregaard Pedersen tlf.: 346476/529844-mut imaluunniit e-mail: mesp@nanoq.gl imaluuniit pan@nanoq.gl. aqqutigalugit attaveqarfigineqassaaq.