AtuartigukIlulissani takornariartitsinermut isumasioqatigiissitsineq isummanik assigiinngitsunik pissarsiaqarfiulluartoq
Nassiussisuuvoq: Nunanut Allanut, Inuussutissarsiornermut Niuernermullu Naalakkersuisoqarfik
Nunanut Allanut, Inuussutissarsiornermut Niuernermullu Naalakkersuisup Vivian Motzfeldt-ip takornariaqartitsinermut isumasioqatigiissitsinera tallimanngornermi septemberip qulingiluaani Ilulissani Sermermiuni ingerlanneqarpoq.
Siuliani takornariaqartitsinermut isumasioqatigiisitsineq Qaqortumi ingerlanneqarpoq, kujataani takornariaqartitsinermi suliaqartut amerlasuut peqataaffigisaannik. Matumani isumasioqatigiissitsinermi Avannaata kommuniani takornariartitsisarnermik ingerlatsisuusut naapeqatigineqarput.
Takornariaqartitsinermut isumasioqatigiissitsinerup siunertarivaa Nunamut Tamarmut Atuuttumik Takornariartitsisarnermut Periusissialiornermut paasissutissanik katersinermi takornariartitsinermi inuussutissarsiortut isumaannik tusarniaaviginissaat.
”Isumasioqatigiinnermi amerlasuut peqataanerat assut qujamasuutigaara, takornarialerinermut tunngatillugu isummat amerlasuut tusarnissaat pingaaruteqarmat. Avannaani takornariaqartitsinikkut inerisaasoqarluarnikuuvoq, qilanaarisimavaralu takornarialerinermi misilittagaqarluartut qanimut naapeqatigalugillu isumaasa tusarnaarnissaat. Imaatigut angallassisartut, takornarialerinermi susassaqartut unnuisarfiutilippassuillu isumasioqatigiinnermi peqataapput, pingaartipparalu takornarialerinerminni misilittakkat unamminartut takorluukkallu tamaasa tusarnaassallugit. Isumasioqatigiissitsinermi eqqartorneqartut siammasipput, ilaatigut siunissami takornarialerinikkut inerisaanermi sinaakkutit erseqqarissut pisariaqartinneqarneri, aamma siunissami takornariaqarnerulerneratigut illoqarfiup ataqatigiinnerata attaveqaatillu sutigut pitsanngorsarneqarsinnaanersut eqqarsaatigalugit”, taama oqarpoq Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt.
Naalakkersuisup nuna tamakkerlugu angalanera ingerlaqqissaaq, tassani Aasiaat Sisimiut Nunattalu Kangia tikinneqassallutik.
Annertunerusunik paasissutissarsiumagaanni attavigineqarsinnaavoq Nunanut Allanut, Inuussutissarsiornermut Niuernermullu Naalakkersuisoqarfik ugguuna isiin@nanoq.gl imaluunniit Naalakkersuisup allattaa Arnaruluk Lundblad email: alun@nanoq.gl imaluunniit oqarasuaatikkut +299 34 56 82