AtuartigukMimi Karlsen: Akiuussuserneqarnissannut angerpunga
Nassiussisuuvoq: Peqqissutsimut Naalakkersuisoqarfik
Maanna Coronamut akiuussuserneqaqqinnissamut piffissanngorpoq, tassa 50-it sinnerlugit ukioqaruit imaluunniit Peqqinnissaqarfimmit immikkut aarlerinartorsiortuusutit pillugu ilisimatinneqarsimaguit. Amerlanerpaat neriukkunaraluarput Corona taassumunngalu akiuussusersornerit qaangersimagivut, kisianni nunarsuaq tamakkerlugu ilisimatuut naatsorsuutigaat ukiap ingerlanerani tunillatsittut amerlissasut. Naak Covid-19-ip allannguutai nutaat sakkortuumik napparsimalersitsineq ajoraluartut, utoqqaanut ingammik sakkortuumik atugaqarnissaq aarlerinarsinnaavoq.
Akiuussutissat piareerpata kapitinniartoq ataaseq tassaavoq Meeqqanut, Inuusuttunut Ilaqutariinnut Peqqissutsimullu Naalakkersuisoq Mimi Karlsen.
"Naak peqqikkaluarlunga sisamassaanik kapitissamaarpunga. Kingullermik akiuussusersorneqarama malugaara. Iluarpallaanngilaq, kisianni sapaatit akunnerpassuarnik napparsimanissaq ajornerpaavoq, tamannalu uattut ukioqartunut suli periaannaalluni", Mimi Karlsen pingasoriaq akiuussusersorneqarnikoq aammalu Covid-19-imik napparsimanikoq oqarpoq.
Nunarsuaq tamakkerlugu nappaalanersuaq aallartimmalli Coronavirusi tunillannarnerulersimavoq kisianni aamma navianannginnerulersimalluni. Ukiap ukiullu ingerlaneranni Nunatsinni inuppassuit tunillatsissasut naatsorsuutigineqarpoq. Imaanngilarli inuiaqatigiit matuneqassasut imaluunniit killilersuinerit tamanut atuuttut pilersaarutigineqartut. Corona maannakkut influenzatut allatulli isigineqarpoq.
"Corona qangatulli navianartiginngilaq. Taamaakkaluartoq neriuutigaara kikkut tamarmik illersorniarlutik akiuussutissamik kapitissasut", Mimi Karlsen oqarpoq.