AtuartigukInoqarfiit pillugit ataatsimeersuarneq
Nassiussisuuvoq: Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik
Atserineq, aqqusineqarneq, inissiat taakkulu peqqissutsimut sunniutai, umiarsualiviit, angallassinermut kiffartuussinissamut isumaqatigiissutit ilaatigut eqqartorneqassapput sap. ak tulliani Inoqarfiit pillugit Ilulissani ataatsimeersuartoqalerpat.
Naalakkersuisut, borgmesterit, Nunaqarfinni Aqutsisut, Najukkani Ataatsimiititaliat, atorfilittallu ataatsimeersuarnermi peqataassapput.
Jess Svane, Isumaginninnermut Suliffeqarnermut Nunamullu Namminermut Naalakkersuisoq:
“Neriuutigaarput ataatsimeersuareernerup kingorna anigorniagassasi ukkatarineqarnerulerumaartut, taamaalilluni ineriartorneq ingerlasinnaalissalluni aammalu pissutsit atukkasi pitsanngorsarneqalissallutik. Eqqaamassavarsi anigorniagassat suunersut ilissi erseqqissassagassigit pissutsit ilisimagassigit. Taamaattumik kommunissinni sunniuteqarsinnaatitaanersi atorsiuk. Naalakkersuisut eqimattanik suliaqarnerit inerneri katersussavaat aammalu qulequttat ataatsimeersuarnermi matumani oqallisigineqartut, periusissanik pilersaarutinillu suliaqarnerup ingerlaqqinneranut tunngavigissallugit”.
Inoqarfiit pillugit ataatsimeersuarnermi illoqarfiit mikinerit nunaqarfiillu pineqassapput. Ulluni 7. septembari – 8. septembari 2022 Ilulissani Sermermiut Kulturhusimi ataatsimeersuartoqassaaq.
Paasissutissat sukumiinerusut pissarsiarineqarsinnaapput naalakkersuisup allattaa Helene S. Pedersen saaffigalugu mail: hspd@nanoq.gl oqarasuaat: 270243.