Múte: Sammivik takutissavarput

Kalaallit Nunaat Issittorlu pineqartillugit siuttuusoq tassaammat Kalaallit Nunaat, Arctic Circle Greenland Forumimut Naalakkersuisut siulittaasuata Múte Bourup Egedep erseqqissaatigaa.

Oqalugiarnermini ilaatigut oqarpoq: ”Nunarsuup tamarmik isit avannamut sammipput, ukiunilu kingullerni marlussunni issittumut Kalaallit Nunaannullu soqutiginninnerup annertusiartornera malugisimavarput.  Nunani tamalaani politikkerit, inuussutissarsiortut, takornarissallu Kalaallit Nunaannut angalanerulerput. Tamarmillu tikilluaqqusaapput, taamaattorli uagut piumasaqaatigut tunngavigineqassapput.

Nunarsuarmioqatigiinnut peqataasuppugut. Kalaallit Nunaat siuariartorterusupparput. Mingutsitsinngitsumik nukissiuutit piujuartitsinerlu ineriartorterusuppavut. Kisianni uagut piumasaqaatigut tunngavigineqassapput. Aamma ataqqigutsigut tusarnaarlutalu tikilluaqqusaavusi.

Ukkatarinninneq Kalaallit Nunaannut sammisinneqarpat, taava uagut qamutini qimusersaavut - uagut takutissavarput suup tungaanut ingerlasoqassanersoq, Múte Bourup Egede oqarpoq.