Vivian Motzfeldt-ip Narsarsuaq aamma Narsaq tikeraarpai

Nunanut Allanut, Inuussutissarsiornermut Niuernermullu Naalakkersuisup aggustip 20-ani nunatta kujataani angalanerminut atatillugu Narsarsuaq aamma Narsaq tikeraarpai.

Nunanut Allanut, Inuussutissarsiornermut Niuernermullu Naalakkersuisup Vivian Motzfeldt-ip Narsarsuarmi Blue Ice soqutiginarluartumik pulaarpaa, aammalu najukkami ingerlatsisut allat naapisimaarlugit.

"Assut soqutiginarpoq sumiiffiup oqaluttuarisaanitsinnut attuumassuteqartup tikeraarnera, nuannaarutigaaralu paasigakku takornariartunik tikittoqaqqittalersimanera. Inuit ulapputtut naapippakka, nuanneqaarlu misigalugu coronap kingornagut inuussutissarsiortut ulapputeqqilertut." Taama oqaaseqarpoq Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt.

Tamatuma kingornagut angalaneq Narsamut ingerlaqqippoq, aallarnisaasumut Kattie Nielsen-imut isumassarsiorfiulluartumik pulaarnermik aallarnerneqartumik. Kattie Nielsen-ip sulisuni peqatigalugit ingerlatarai ilaatigut takornariartitsisarnermik suliaqartut, Hotel Narsaq, Immiorfik Qajaq Beer aammalu Café Inugsuk.

”Assorsuaq Kattie naapisimaarlugu isumassarsinarpoq soqutiginarlunilu, - kujataani najukkami aallarnisaanermik ingerlatsisuusoq, takutitsisoq periarfissaqartoq namminersortutut illoqarfimmi anginngitsunnguami inuussutissarsiutinik ingerlatsinissamut, naak amerlasuunik tamanna unammilligassaqarnaraluartoq,” taama oqarpoq Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt.

Tamatuma kingornagut Inuili pulaarneqarpoq, ilinniarfillu nerisassanik mamartulianik sassaalliivoq, najukkamit namminermit nioqqutissianik akoqartunik. Ilinniarfiup suliniutigiuarpaa nunatsinnit kalaallit piinik sapinngisamik amerlasuunik ilinniartitsinermik ingerlatsinermi atuisoqarnissaa, inuit nunatsinni neriniartarfinni assigiinngitsuni sulisuulerumaartut ilinniartinneqarnerinut atatillugu.

Ilinniarfimmi forstanderi Poul Kristensen pitsaasumik isumasioqatigineqarpoq, kalaallit nioqqutissiaataannik ineriartortitsineq eqqarsaatigalugu, tamakkualu minnerunngitsumik takornariartitsinermi iluaqutissatut ineriartortinneqartarnerat pillugu, najukkanimmit namminermi nioqqutissiat soqutigineqarluartarput.

Vivian Motzfeldt-ip Nunatta Kujataani angalanera tassaavoq nunatsinni sumiiffinnut assigiinngitsunut angalasarnissat aallaqqaataat, takornariartitsinermut periusissiamik takornariartitsinermullu nutaamik inatsisiliornermut atatillugu paasissutissanik ilisimasanillu katersiviuvoq.


Annertunerusunik paasissutissarsiumagaanni attavigineqarsinnaavoq Nunanut Allanut, Inuussutissarsiornermut Niuernermullu Naalakkersuisoqarfik ugguuna isiin@nanoq.gl imaluunniit Naalakkersuisup allattaa Arnaruluk Lundblad email: alun@nanoq.gl imaluunniit oqarasuaatikkut +299 34 56 82