Aavarnermi umimmanniarnermilu maleruaqqusat naapertorneqassapput

Tuttunniarnermi umimmanniarnermilu malittarisassat atuuttut unioqqutillugit piniartoqartarmat Aalisarnermut Piniarnermullu Naalakkersuisoqarfik sakkortuumik matumuuna erseqqissaassuteqarusuppoq.

Aalisarnermut Piniarnermullu Naalakkersuisoqarfimmi ilisimavarput aavartut ilaat qimmilisaarlutik aaffarmiittartut, angallatiniillu unioqqutitsisumik tuttunniartoqartartoq, meeqqallu ukiumikkut inuuttut tuttunniartarlutik.

Tuttunniarneq umimmanniarnerlu illersorneqarsinnaasumik malittarisassallu naapertorlugit pisussaavoq, pisallu nalunaarutigineqartarnissaannut malittarisassaqarluni.

Qimmit - inerteqqutaapput
Tuttunniarnermi umimmanniarnermilu qimmit nassaqqusaanngillat. Tamanna § 14-mi, Imm. 3, takuneqarsinnaavoq qimminullu tamanut atuulluni, qimuttunik qimmeqarfiit ukiuunerani qimussit assartuutitut atuiffiusartut minillugit. Piniarnermi pissutsit tamanut assigiittussapput, qimmillu tuttunik umimmannillu arlalitsigut qimaatitsisinnaallutik.

Angallatinit piniartoqaqqussanngilaq
Sunngiffimmi aallaaniarsinnaanermut allagartat pillugit Namminersorlutik Oqartussat nalunaarutaat nr. 14, 30. december 2014-imeersoq, malillugu inunnut 12-nik ukiulinnut utoqqaanerusunullu piniarsinnaanermik allagartamik tunniussisoqarsinnaavoq. Taamaakkaluartorli tuttut taamatullu umimmaat illersugaanerat piniagaanerallu pillugit nalunaarutini § 8 malillugu tuttunniarnissamut umimmanniarnissamullu akuersissutinik qinnuteqarsinnaassagaanni 16-inik ukioqalereersimasussaapput. Akuersissut inummut atiatigut taasamut taamaallaat atuuppoq allanullu tunniunneqarsinnaanani. Taamaammat tuttut imaluunniit umimmaat akuersissut malillugu pisarineqarsinnaasut allanit pisaritinneqarnissaat inerteqqutaavoq.

Kalaallit Nunaanni pinerluttulerineq pillugu inatsimmi § 3, Imm. 2, malillugu sakkut ulorianartut inunnut 12-it inorlugit ukiulinnut tunniuteqqusaanngillat, tamannalu tuttunniarnermi umimmanniarnermilu aamma atuuppoq.

Inuuttut piniaqqusaanngillat
Tuttut taamatullu Umimmaat illersugaanerat piniagaanerallu pillugit Namminersorlutik Oqartussat nalunaarutaanni § 14, immikkoortoq 1 aamma 2, naapertorlugit assartuutit tuttunik umimmannillu malersuinermut ungoorinermullu atoqqusaanngillat, tamannalu umiatsianut aamma atuuppoq. Aalajangersakkat pineqartut pissatanik malitsigisaanilu uumasunik naalliutitsinermik pinaveersaartitsineq siunertaraat. Piniarneq aammattaaq kaliberit eqqortut atorlugit naleqquttumillu ungasissuseqarnermiit ingerlanneqassaaq, piniakkap sukkasuumik iluameersumillu toqunneqarnissaa siunertaralugu.

Naalakkersuisoqarfiup kingullertut eqqaasitsissutigissavaa tuttunniareernerup imaluunniit umimmanniareernerup kingorna kommunimi Sullissivimmut pisanik nalunaaruteqarnissaq pisussaammat. Pisanik nalunaaruteqarneq akuersissutit tunuanniittoq immersuiffissamik immersuinikkut pisinnaavoq, tamannalu kingusinnerpaamik piniareernerup kingorna ullut 14-it qaangiutinnagit pissaaq. Pisanik nalunaaruteqarnissamut pisussaaffik tuttumik imaluunniit umimmammik pisaqarsimanngikkaluaraanniluunniit aamma atuuppoq. Malittarisassanik atuuttunik unioqqutitsinerit akiliisitsinermik arsaarinninnermillu kinguneqarsinnaapput.

Erseqqinnerusumik paasisaqarusukkaanni Immikkoortortaqarfimmi pisortaq Amalie A. Jessen, amalie@nanoq.gl Aalisarnermut Piniarnermullu Naalakkersuisoqarfik tlf. 34 53 04 saaffigineqarsinnaavoq.