Imarisassat tusarnaarlugit atuarlugitNapparsimasut angalanerisa sivitsornera Peqqiinnissaqarfimmit ajuusaarutigineqarpoq
Nassiussisuuvoq: Peqqissutsimut Naalakkersuisoqarfik
Angallanneq timmisartut ilaasussanik ulikkaartut, pujornera teknikkikkullu unammilligassat pissutaallutik annertuumik kinguaattoornerit, Peqqinnissaqarfimmi ingerlatsinermut sunniuteqarput. Sunniutaasoq napparsimasunit qanigisasunillu misigineqarpoq.
”Tamatuma kinguneri, napparsimasunut amerlasuunut nakorsartinnerminni utaqqisunut, ilaatigullu sap. akunnerini arlalinni ingerlariaqqissinnaasimanngitsunut, ajuusaarutigaagut” Peqqinnissaqarfimmi pisortaq Tina Amondsen oqarpoq. ”Nunatsinnut nunatsiniillu angallaffiusut annertuumik ilungersortinneqarnerisigut – napparsimasut sulisullu angalanerisa iluatsinnissaa Peqqinnissaqarfimmut ajornakusuulerpoq”
Tamanna aasap ingerlanerani nunatta iluani napparsimasunik angallassinerup kinguaattoorfiuneranik, napparsimasullu ilaasa arlaleriarlutik taamaatiinnarnerannik, Peqqinnissaqarfimmut kinguneqarpoq. Tamatuma peqatigisaanik peqqinnissakkut sullissisut arlaleriarlutik kinguaattoortitaangaatsiartarput.
”Nakorsaq kujataaliartoq timmisartuni inissaqannginneq pissutaalluni, Island Ilulissallu aqqusaarlugit sisamariarluni unnuinertalimmik angalasariaqarpat, imal. qitiusumik napparsimmavigut napparsimasunik Nuummut nuussisinnaanngippata, taamaammallu inissaqannginneq pissutaalluni naartusunik qitiusumik napparsimmavinneersunik unititsisinnaannginnerat, innuttaasunik sullissinitsinnut annertoqisunik sunniuteqarpoq” Tina Amondsen nassuiaavoq, imalu nangilluni: ”Ernerlaat nakorsartereersullu soorunami ingerlaannaq angerlarnissartik kissaatigaat, ajoraluartumilli arlalitsigut inissarsiniarneq ajornakusoortoq paasinarsivoq, pisariaqanngitsumillu sivisuallaamik uninnganermik kinguneqarluni. Napparsimasut nakorsartereersut Københavnimi Kalaallit Peqqissartut Illuanniittut, aggustimi angerlarnissaminnut ullut 14-it pallillugit utaqqisariaqarneq misigaat.”
King Air aamma sunnerneqarpoq
Timmisartuussisarnerit napparsimasunut sulisunullu ajornakusoornerujussuisa saniatigut, Air Greenlandip napparsimasunut angallassissutaata (King Air-ip) aasap ingerlanerani arlalippassuariarluni teknikkikkut ajornartorsiuteqarnermik eqqugaanera upalungaarsimanermut sunniuteqarpoq.
”Siullertut pingaarnertullu inuunerminnik navianartorsiortunik pinasuartumik angallassinerni, aammali napparsimasunik nuussinerni, King Air Peqqinnissaqarfimmut angallannikkut ataqatigiissaarinermi pingaaruteqarluinnartuuvoq. Taassuma pilersaarutaasutut atorsinnaannginnera ajornartorsiutaavoq annertooq, angallannikkullu ataqatigiissaarisut, upalungaasimanerup iluani killeqareeqisumi, allanik periarfissarsiortariaqarnerannik kinguneqarluni” Tina Amondsen erseqqissaavoq.
”Massakkorpiaq avannaani napparsimasut 20-it sinneqartut aallarsinnaanngornissaminnut utaqqipput, utaqqisut ilaat nukinginnartuummata pilertortumik aaqqiissutissanik suliniuteqartoqarpoq. Kalaallit Nunaanni Peqqinnissaqarfiup tamanna ajuusaarutigaa, piffissarlu angallaffiunerpaaq qaangiutilermat pissutsit pitsaanerulerumaarnerat, timmisartunilu inissaqaqqilerumaarnissaq neriuutigalugu,” Tina Amondsen naggasiivoq.
Tusagassiorfinnut nalunaarut una pillugu annertunerusunik paasisaqarusuttut uunga attaveqassapput: Sundhedsledelsen@peqqik.gl