Peqqinnissaqarfimmi sulisussaqarnniarnikkut inissisimaneq - aasaq 2022

Qaammatini tulliuttuni nuna tamakkerlugu Peqqinnissaqarfik sulisussarsiornermik suli annertunerusumik ilungersunartorsiorpoq. Juunip, juulip, aggustip septembarillu ingerlanerani nunap immikkoortui aamma Dronning Ingridip Napparsimmavissua peqqissaasoqarniarnikkut annertuumik tatisimaneqassapput. Aasap qaammataani Peqqinnissaqarfimmi atorfiit inuttalersorniarneqarnerat ajornakusoortanera takornartaanngilaq, aasarmannali sulisussarsiorneq nalinginnaasumiit ilungersunartorsiornarneruvoq.

Ilaatigut nunarsuaq tamakkerlugu COVID-19 tamatumalu kingornatigut pisut pissutigalugit, Peqqinnissaqarfik ukiuni kingullerni marlussunni peqqissaasunik nakorsanillu sulisussarsinissaq nalinginnaasumiit sapernarnerulersimavoq. Peqatigisaanik erseqqinnerulersimavoq peqqinnissaqarfiup iluani sulisussarsiornermi nalinginnaasumik annertunerusumik unammillertoqalersimasoq, tamannalu aasaq mannamut Peqqinnissaqarfimmut immikkut sunniuteqarpoq.

Peqqinnissaqarfimmi sulisussarsiornerup pitsanngorsarnissaa anguniarlugu sulisussarsiornermi suliniutit annertusarneqarput kiisalu taartaasussarsiortarfinniit peqqinnissakkut sulisussarsiortoqarpoq.  Naak sulisussarsiornerneq annertusarneqareeraluartoq aasap ingerlanerani Peqqinnissaqarfiup ingerlataasa qaffasissussaat attatiinnarniarlugu naammattunik sulilersitsisoqarsinnaasimanngilaq.  Innuttaasut sapinngisamik ikinnerpaamik pisumut sunnerneqarniassammata, Peqqinnissaqarfik Peqqissutsimullu Naalakkersuisoqarfik pissutsit pitsanngortinniarlugit assoroorluni suliaqarpoq. Sulineq pillugu ataavartumik avammut nalunaarutigineqartassaaq.

Pisup kingunerisaanik qaammatini tulliuttuni Peqqinnissaqarfik piffissap ilaanni peqqinnissakkut sullissineq arlalitsigut nalimmassartariaqalersinnaavaa. Suliniutaasinnaasut ataani allaatigineqarput:

1. Dronning Ingridip Napparsimmavissuani sulisoqarniarnikkut nalimmassaaneq:
   
   1. Siniffitsigut inissat matoqqasut

   Peqqinnissaqarfimmi sulisussarsiornermi ajornartorsiutit kinguneri tunngavigalugit sulinngiffeqarnerup nalaani nalinginnaasumiit siniffiit arlallit matusariaqalerput. Piffissat ilaanni pinasuartumik napparsimasut kisiisa isumagineqarsinnaassapput.

   1. Ikinnerusunik pilattaaneq aamma sivisunerusumik utaqqineq.

   Piffissat ilaanni pilattaanerit ikilissapput. Pilersaarutaasumik napparsimasunik misissuinerit katsorsaanerillu kinguartinneqassapput, tamatumalu kingunerisaanik utaqqisutut allattorsimasut amerlissapput. Napparsimasut eqqugaasut allannguutit pillugit saaffigineqarumaarput.

    

2. Nunap immikkoortuini Peqqinnissaqarfimmut attaviit allanngortinneri:

   Nunap immikkoortuini tamarmi sulisussarsiornikkut ajornartorsiuteqartoqarpoq, nunalli immikkoortui ilaat annertunerusumik sulisussarsiornikkut ajornartorsiornerupput. Nunat immikkoortuinut tamanut atuuttoq tassaavoq sulisoqarniarneq annikinnerusoq, taamaattumillu piffissat ilaanni innuttaasut Peqqinnissaqarfimmut ileqquusunit allaanerusunit innersuunneqartassapput. Assersuutigalugu nal. sisamat kingorna najukkami Peqqissaavinnut pinnani qitiusumik Napparsimavimmut saaffiginneqquneqassaaq. Innuttaasut eqqugaasut najukkami Peqqinnissaqarfimmiit ilisimatinneqartarumaarput.

    

3. Nunap immikkoortuisa napparsimaviannut, Nuummut aamma Danmarkimut napparsimasunik nuussinerit amerlanerit

   Piffissat ilaanni peqqissaavinni/qitiusumik napparsimmavinni/Dronning Ingridip Napparsimmavissuani nakorsat peqqissaasullu ikinneranni imaluunniit sulisorineqannginneranni, napparsimasut amerlanerit nuutsinneqartariaqarnerat aamma qimarngunneqartariaqarnerat naatsorsuutigineqartariaqarpoq.

    

4. Erninerit Nuummut nuutsinneqarsinnaapput

   Nunap immikkoortuani napparsimmavimmi illersorneqarsinnaasumik erninissamut upalungaarsimasoqarnissamut sulisunik pisariaqartunik peqanngippat arnat naartusut Dronning Ingridip Napparsimmavissuani erniartornissaat piffissani pisariaqarsinnaavoq.

    

5. Sumiiffiup avataani suliat annikinnerulerneri

Nakorsiartitsinermut naammattunik sulisussaqanngippat tamatumalu peqatigisaanik qitiusumiknapparsimmaviit aamma peqqissaaviit sulisoqaannarnissaat attanniarlugu nunaqarfinni nakorsiartitsinerit kinguartinneqassapput imaluunniit taamaatinneqassapput. Nakorsiartitsinerit kingusinnerusukkut pinissaat sulissutigineqassaaq. Innuttaasut peqqinnissakkut sullinneqarnissamut pisariaqartitsippata, innuttaasut peqqinnissaqarfik attavigisinnaavaat, tamatumanilu innuttaasut peqqinnissakkut immikkut nalilersorneqartassapput.

Najukkami nalimmassaanerit pillugit Peqqinnissaqarfik innuttaasunut ataavartumik ilisimatitsissutigineqartassaaq. Assersuutigalugu peqqinnissakkut sullissinissat pillugit attaveqaatissanut allannguutaasinnaapput. Paasissutissat Peqqinnissaqarfiup tamanut attaveqaataasigut najukkami peqqinnissaqarfimmiit innuttaasunut ingerlateqqinneqartassapput. Innuttaasut nakorsartinnissaminnut allannguuteqartussat allannguutit pillugit saaffigineqarumaarput.

Annertunersumik paasisaqarusuttut naalakkersuisup allattaa Frederik Kristiansen +299 34 56 85 imaluunniit e-mail: frek@nanoq.gl aqqutigalugit attavigisinnaavaat.