Falckip nunatsinni Peqqinnissaqarfimmi droninik atuineq misilinnialerpaa

2022-imi novembarip tungaanut Falckip nunatsinnilu Peqqinnissaqarfiup, dronit atorlugit nakorsaatinik misissugassanillu illoqarfiit nunaqarfiillu akornanni angallassineq misilinniarpaat. Suliniummi nunaqarfinni angallannikkut unammilligassaasuni napparsimmavimmullu qaninnermut ungaseqisumiittuni, peqqinnissakkut sullissinerup dronit atorlugit nukittorsarneqarsinnaaneranik paasiniaasoqarniarpoq.

Peqqissutsimut Pitsaaliuinermullu Aqutsisoqarfik (Namminersorlutik Oqartussat) Kalaallit Nunaannilu Peqqissutsimik ilisimatusarfik suleqatigalugit Falcki Peqqinnissaqarfimmi droninik atuinermut alloriassaaq. Dronit nunaqarfiit napparsimmaviillu imminnut qaninnerulersissavaallusooq, nunatsinnilu Peqqinnissaqarfik Sermersooq droninik atuinermik misileeqqaartuussaaq. Falck ukiorpanni Peqqinnissaqarfimmi droninik atuutilersitsinermik suliaqarsimavoq, Peqqinnissaqarfimmillu qanimut suleqateqarnikkut ataqatigiissaarinermik aaqqisuussaanermut naapertuuttunik pilersitsineq misilittagaqarfigilluarlugu. Nunatsinni Peqqinnissaqarfimmi pisortat aaqqisuussaanermik innuttaasullu pisariaqartitaannik ilisimaarinnittut peqatigalugit, Peqqinnissaqarfimmi ikorfartuutaasussamik droninik atuinermik inerisaassapput.

” Dronit qanoq Peqqinnissaqarfimmut iluaqutaasinnaanerat innuttaasunullu napparsimmavimmut qaninnermut ungaseqisumiittunut ikiuussinnaanerat pissangagaarput. Suleriaasissamik Peqqinnissaqarfimmi suleriaatsinut ingerlatanullu ullumikkut pioreersunut atuulluarsinnaasumik qulakkeerinissaq massakkorpiaq suliniutaavoq” Peqqissaasut qullersaat Ella Skifte oqarpoq.
Dronit nakorsaatinik ass. antibiotikanik misissugassanillu Dronning Ingridip Napparsimmavissuaniit Kapisilinnut Qeqertarsuatsiaanullu assartuissapput. Nunaqarfinniit napparsimmavimmut qaninnermut aqqut isorartoqimmat nappaatit suussusersinissaannut. nakorsaatillu inuunermut pingaarutillit pisariinnerusumik pilertornerusumillu sumiiffinnut isorartoqisunut apuunnissaannut dronit iluaqutaasinnaapput.

” Kalaallit Nunaanni Peqqinnissaqarfimmik suleqateqarneq taakkulu siumut isiginerat, maanna peqqinnissaqarfiup droniisa, Peqqinnissaqarfimmut pioreersumut ilanngullugit angallavinni isorartuuni qanoq atorsinnaanerannik, pimoorullugu misiliisinnaaneq nuannaarutigeqaarput. Misilittagarilerumaakkagut aalajangiisuussapput, Peqqinnissaqarfimmilu droninik atuinermik annertusaanissatsinnut tunngavissiissallutik” taama oqarpoq Nicolai Søndergaard Laugesen, inerisaanermi pisortaq Falckimilu dronit atorlugit suliniutini akisussaasoq.

Nappaatinik suussusersigasuarnissap pingaaruteqassusaa Nappaatit pilertornerusumik suussusersineqarnissaannut nakorsaatillu pilertortumik tunniunneqartarnissaannut dronit iluaqutaasinnaanissaat, Peqqinnissaqarfik Sermersuumi nakorsatut pisortap neriuutigaattaaq.

“PIlertornerumik nakorsartinneq nappaatini peruluutaasuni annertuumik sunniuteqarsinnaavoq. Peqqinnissaqarfiup qitiusumik immikkortuani matumani isorartussutsimik misiginermik dronit qanoq annikillisitseqataasinnaanissaasa aammalu peqqinitsinnik qaffassaaqataasinnaanissaasa takunissaa qilanaaraara,” Jesper Olesen oqarpoq.
Isorartussuseq pissutaalluni utaqqisarneq akisullunilu ilaatigut napparsimasup aqqusaagaanut aalajangiisuulluinnarsinnaasarpoq. Taamaammat droninik atuinissamik suliniutip, siunissami napparsimasut aqqusaartugassaannik kinguneqarluarnerusunik, misissuinerillu inernerinik pilertornerusumik akissutisinissamut- taamaalillunilu pilertornerusumik nakorsaasiinissamut- periarfisseeqataasinnaanissaa naatsorsuutigineqarpoq.

”Nunatta isorartussusaa nunasseriaaserlu, innuttaasut peqqinnissakkut sullinneqarnissamut periarfissaqarnerannut tunngatillugu immikkut ittunik piumasaqaatitaqarlutillu unammilligassiivoq. Suliniut nunaqarfiit illoqarfiillu akornanni peqqinnissakkut sullissinermik nukittorsaaqataasinnaasoq tunngavigalugu paasissutissanik katersinissaq, Peqqissutsimut Ilisimatusarfimmeersuusugut qilanaaraarput,” Peqqinnissaqarfik Sermersuumi nakorsaq Kalaallit Nunaannilu Peqqissutsimut Ilisimatusarfimmi aqutsisoqatigiinni siulittaasoq Gert Mulvad oqarpoq.

Suliniut Peqqinnissaqarfik Sermersuumi nakorsatut pisortamit Jesper Olesenimit Falckimilu inerisaanermut immikkoortortamit Verticalimit, ukiorpanni Peqqinnissaqarfinni droninik atuutilersitsinermik atuinermillu suliaqarfiusumit aallaaveqarpoq.

Paasisaqarnerorusukkuit Attaveqatigiinnermi Siunnersorti Susanne Lauridsen e-mail: suml@peqqik.gl imaluunniit oqarasuaatikkut: +299 344716 attavigineqarsinnaavoq.