Kalaallit ilisimasassarsiortut sisamat New Yorkimi nunanit tamanit nersorniarneqartut

Piniartut sisamat Avanersuarmeersut, Ootah (Uutaaq), Egingwah (Iggiannguaq), Seegloo (Sigluk) aamma Ooqueah (Ukkujaaq) amerikamiut marlut Matthew Henson admiral Robert Pearylu 1909-mi Qalasersualiarnerannut ikiuulutillu ilitsersuipput.

Taamaalilluni kalaallit sisamat amerikamiullu marluk inunni siullersaallutik Qalasersuaq anguvaat.

Sisamat taakku Kalaallit Nunaanni Qalasersuarmeeqqaartutut ilisimaneqarput, angusaalli nunarsuup sinnerani siusinnerusukkut nersorniarneqasimanngilaq. Nersuiniarneq siullermik admiral Pearymut, kingornalu Matthew Hensonimut tutsinneqarpoq, maannalu New Yorkimi The Explores Clubip sisamat taakku pisortatigoortumik New Yorkimi The Explores Clubimi nersorniarneqassasut aalajangerpoq. Persuarsiorneq ulloq 22. april 2022 ullaakkut New Yorkimi 46 streetimi inini kusanartuni oqaluttuarisaanikkullu pingaarutilinni pivoq.

Persuarsioneq ujaqqanik natissianik nutaanik taakku aqqisa allassimaffigisaannik aallarnerneqarpoq, taamaalillunilu taakku ataqqinassusaat angusaallu ilisimasassarsiortorsuarnut arlalinnut issittumilu ilisimasassarsiortunut allanut naligiissinneqarput, tassani Henson Pearylu ilanngullugit. Navarana Kavivak (Uutaap ernutaa Aviaq Hensonilu (Matthew Hensonip ernutaqqiutaa) kiisalu eqqumiitsuliortoq Paninnguaq Lind Jensen Kalaallillu Nunaata Sinniisoqarfiata pisortaa Kenneth Høegh nalliuttorsiornermi peqataapput.

Navarana qilaatersornermik ilisarititsillunilu oqalugiarpoq, oqalugiarnermilu kusanartumik iliuuseqarneq qujassuteqarfigalugulu aatani oqaluttuaraa, taamatullu aamma Qaanami ilaquttami inuulluaqqussutaat anngullugu. Aviap oqalugiarnermini oqaluttuarisaanermut ilanngunneqarneq tussunngunartoq erseqqissaatigaa, imatut paasillugu kiisami nersorniarneqarnerup qanoq pingaarluinnartiginera. Kenneth Høegh Naalakkersuisut sinnerlugit oqaaseqarpoq, tassanilu sallertut The Explores Club nunat tamat akornanni nersorinninneranik qujassuteqarfigaa. Ilanngullugu taakku sisamat ilisimasassarsiortutut sapiissusaat aalajangersinnaassusiallu, ulloq manna tikillugu Kalaallit Nunaanni maligassiuillunilu tulluusimaaritigineqartoq oqaatigaa.

Nersiorinninniarnermi inuit 100-t angullugit peqataapput, kalaalillu peqataasut saniatigut New Yorkimi danskit generalkonsulateqarfiannit sinniisut, kiisalu amerikamiut ilisimsatusartut The Explores Clubillu ilaasortai peqataapput.

Taamattaaq sapaatip akunnerata naanerata ingerlanerani Paninnguaq Lind Jensen inuit “people changing the world” (inuit nunarsuarmik allannguisut) ilaattut toqqarneqarpoq, taamaalillunilu tamanna nunarsuarmioqatigiinnit kalaallimut eqqumiitsuliortumut tamatigoortumut nersorinninneruvoq annertooq.