Aalisarsinnaanermut akuersissutit tunisisarnerlu pillugit nakkutilliinermik paasisitsiniaaneq
Nassiussisuuvoq: Aalisarnermut Piniarnermullu Naalakkersuisoqarfik![](/-/media/billeder/bygning/royal_greenland_.jpg?cx=0.5&cy=0.5&cw=975&ch=415&hash=2B73A3F706D4F5472A3942D309555221)
Kalaallit Nunaanni Aalisarsinnaanermut Akuersissutinik Nakkutilliisoqarfiup aaqqissuussaanik sinerissap qanittuani aalisarnermi aalisarsinnaanermut akuersissutit tunisisarnerlu sammillugit nakkutilliinermik sapaatit akunnerini aggersuni paasisitsiniaasoqassaaq.
Paasisitsiniaanermi Ilulissani, Sisimiuni Nuummilu ingerlanneqarnerusussami aalisartut aalisaraangamik tunisigaangamillu aalisarsinnaanermut akuersissutertik eqqaamasarneraat paasiniarneqassaaq. Paasisitsiniaanermi pisiortortut aalisartut aalisarnermi pineqartumi aalisarsinnaanermut akuersissuteqarnerannik misissuisarnissamik eqqaamannittarnersut aamma paasiniarneqassaaq.
Aalisakkanik aalisakkanillu tunisassianik tunisisarnernik nalunaarutiginnittarneq pillugu Namminersorlutik Oqartussat nalunaarutaanni nr. 7, 4. april 2016-imeersumi allaqqavoq, aalisartut § 3 naapertorlugu ilaatigut aalisarsinnaanermut akuersissut, pisat, aalisarfik aamma aalisartup aqqa inuttullu normua pillugit paasissutissiisassasut, pisiortortullu § 7 naapertorlugu aalisartup aalisarsinnaanermut akuersissutaa, pisai, aalisarfia, aqqa inuttullu normua pillugit paasissutissiisassasut.
Annertunerusunik paasiaqarusukkuit attavigiuk Kalaallit Nunaanni Aalisarsinnaanermut Akuersissutinik Nakkutilliisoqarfik oqarasuaat 34 50 00 imaluunniit e-maililkkut gflk@nanoq.gl