Coronamut atatillugu isumaginninnikkut ikiorsiissutit

Nualluummik tunillanneqartartut aammalu saaffiginnittut amerliartornerannut atatillugu Isumaginninnermut, Sulisoqarnermut Nunamullu Namminermut Naalakkersuisoqarfik ilisimatitsivoq suliffeerunnermi ikiorsiissutinik imaluunniit pisortat ikiorsiissutaannik qinnuteqarnissamut periarfissaqartoq.

Coronamut atatillugu mattussaaqqagaanni imaluunniit angerlartitaasimagaanni tamanna napparsimanermut atatillugu sulinngitsoornertut aallaaviatigut sanillersuunneqassaaq.

Taamaasilluni suliffeerunnermi ikiorsiissutinik imaluunniit pisortaniit ikiorsiissutinik qinnuteqarnissaq periarfissaqarpoq taakkununnga atatillugu malittarisassat nalinginnaasut naapertorlugit.

Suliffeerunnermi ikiorsiissutinik qinnuteqaat Majoriamut nassiunneqassaaq aammalu pisortaniit ikiorsiissutinik qinnuteqaat kommunimut nassiunneqassalluni.

Isumaginninnermut, Sulisoqarnermut Nunamullu Namminermut Naalakkersuisoqarfik oqarasuaammik saaffigineqarsinnaasumik hotlinemik (801100-mik normulimmik) pilersitsivoq innuttaasunut, sumut saaffiginnissanerlutik nalornisunut, ikiorsiiniarluni. Hotline ataasinngornermiittallimanngornermut nal. 13-miit 16-mut ammasassaaq ulloq 13. decemberimiit 30. december 2021-ip tungaanut ullut nalliuttut ilanngunnagit.

Suliffeerunnermi ikiorsiissutinik qinnuteqaat malittarisassat nalinginnaasut malillugit pissaaq aammalu suliffeerunnermi ikiorsiissutinik pissarsissagaanni piumasaqaatit makku eqquutsinneqarsimasariaqarput:

• Kalaallit Nunaanni innuttaasutut nalunaarsorsimanissaq
• 18-inik ukioqalereersimanissaq imaluunniit pilersuisuusimanissaq, aammalu
• Sapaatip akunnerini kingullerni 13-ni minnerpaamik nal. ak. 182-it suliffeqarsimanissaq

Pisortat ikiorsiissutaannik malittarisassat naapertorlugit pinasuartumik ikiorserneqarnissamut qinnuteqartoqarsinnaavoq:

• Pisortaniit ikiorsiissutinik allanik pisartagaqarsimanngikkaanni
• Qinnuteqartoq pisariaqartumik imminut pilersorsinnaasimanngippat imaluunniit ilaquttaminik pilersuisinnaasimanngippat
• Isumaginninnikkut pisumit (coronamit) eqqugaasimaguni

Isumaginninnermut, Sulisoqarnermut Nunamullu Namminermut Naalakkersuisoqarfik ikiorsiissutit pillugit aalajangiisinnaanngilaq imaluunniit ikiorsiissutit pillugit maalaarutinik suliaqarsinnaanani.

Sukumiinerusumik paasissutissanik pissarsiniaraanni naalakkersuisumut allatsi Naja Lynge Petersen e-mail: nlyp@nanoq.gl imaluunniit oqarasuaat +299 34 56 11 aqqutiga-lugu attavigineqarsinnaavoq.