Frederik “Kunngi” Kristensenimut eqqaaniut

Nunarput eqqumiitsuliornerup silarsuaani annertuumik annaasaqarpoq.

Frederik “Kunngi” Kristensen 1952-imi Uummannami inuusoq 69-inik ukioqarluni novembarip tallimaanni 2021 Nuummi toquvoq.

Eqqumiitsuliortortagut tassaapput inuttut ataasiakkaatut, inuiaqatigiittut, nunarsuarmioqataasutullu immitsinnut tarrarsorfissarisinnaasagut eqqarsalersitsisuusarmata isummanillu assigiinngitsunik pilersitsisarlutik. Anersaakkut kulturitsinnullu pisuunngortitsisuupput aammalu misigissutsitsinnik attuisartut.

Kunngi eqqumiitsuliortuuvoq tamatigoortoq, imaannaanngitsoq immikkuullarilluinnartorlu. 1975-imi Nuummi Grafisk Værstedimi aallartippoq. Københavnimilu Kunstakademimi 1977-imi 1978-imilu tikeraartutut ilinniartuusimalluni. Nunatsinni nutaaliortutut ilusilersugaanngitsunik qalipaasartutut siullersaavoq. Qalipakkanik ukiorpassuarni assilialiortarnermigut ilisimaneqarluarlersimavoq. Suliaminik kusanarsaataalluinnartunik nunatsinni nunanilumi allani saqqummersitsisarsimavoq. Assersuutigalugu Uummannami, Nuummi, Ilulissani, Parisimi New Yorkimi il.il.

Assilialiortarnerup saniatigut taallianik oqaluttuanillu saqqummersitsisarsimavoq. Kunngip atuakkiaasa ilaat “Inunni uannut qaninnerpaaq” 1994-mi “Nordisk Råds Litteraturpris”-imut unammissutitut innersuunneqarsimavoq. 2011-mi Kulturikkut suliniuteqarluarsimasutut Naalakkersuisunit nersornaaserneqarpoq aammalu ukioq taanna nersornaammik sølviusumik tunineqarluni. Juullip nipitittagaata kulturikkut nersornaataanik 2016-imi tunineqarpoq. 2018-imi KODA-mi ataqqinaammik nersornaaserneqarpoq. Eqqumiitsuliortullu peqatigiiffianni KIMIK-mi ataqqinaammik ilaasortaavoq, aammalu Kalaallit Atuakkiortut peqatigiiffianni ilaasortaalluni.

Aammattaaq titartagartalersuisarnermigut ilisimaneqaateqarpoq, assersuutigalugu 1977-imi Juullip Nipitittagaanik atuakkianillu arlalinnik.

Kunngi eqqaaneqartarpoq inuttut avatangiisiminik qalipakkamigut allatigullu suliamigut malussarissuusoq. Ukiuni kingullerni nappaammik eqqorneqarsimagaluarluni suliani ingerlatiinnarsimavai.

Kunngip ilaqutai, qanigisai tamaasa misiginneqatigaakka.

Eqqaaneqarnera ataqqinartuuli.

Peter Olsen