Nunaqarfinni aamma isorliunerusuni ilinniagaqarnerup kivitsiviginissaa Namminersorlutik Oqartussat suli sulissutigaat

Ulloq 21. septembari 2021-mi allaaserisaq ”(Sermersooq: nunaqarfinni ungasianiit ilinniartitsineq) akissuteqarfigalugu nunaqarfinni inuusuttut suli ilinniagaqarnermik ingerlatsilersimanngitsut piginnaanngorsarniarlugit suliniutinik Namminersorlutik Oqartussat suli sulissuteqartuunerat Isumaginninnermut Sulisoqarnermullu Naalakkersuisup Mimi Karlsenip sianigeqquniarpaa.

Nunaqarfinni aamma isorliunerusuni inuusuttunut ingerlatassanik Namminersorlutik Oqartussat neqerooruteqartarunnaarnera Sermitsiaq.ag-mi allaaserisap nalunaarutigaa. Tamanna eqqortuunngilaq.

Isumaginninnermut Sulisoqarnermullu Naalakkersuisoqarfiup NUIKI-mi suliniutit (Nunaqarfinni ilinniartitsinermik kivitsineq) ingerlappai, taamatullu 2016-imiilli ingerlataqarpoq. Aallaqqaammut NUIKI tassaasimavoq 2012-2016-imit Villum Fondenimik suleqateqarluni ukiuni tallimani ingerlasussatut suliniut nunaqarfinni neqeroorutigisaq.

”Ilinniagaqarnermi kivitsinissaq siuarsarniarlugu ukiumi atuarfiusumi 2021-2022-mi inuusuttunut Qeqertarsuatsiaani NUIKI-mi ingerlassaq aallartisarparput, tassuunakkullu siunissami inuusuttut ilinniagaqarnermik ingerlataqarnissamut periarfissinniarpagut. Tamatuma saniatigut NUIKI aamma Qaanaami ingerlassaqarpoq,” Isumaginninnermut Sulisoqarnermullu Naalakkersuisoq Mimi Karlsen oqarpoq.

Ilinniagaqarnermik kivitsinissamik NUIKI siuarsaavoq
Nunaqarfinni isorliunerusunilu ilinniagaqarnermik kivitsinissaq NUIKI-p siuarsartussaavaa, tassaavorlu nunaqarfinni sumiiffikkaani meeqqat atuarfiinik suleqateqarluni pilersinneqartoq, nalinginnaasumik ilinniartitsinerup kingornatigut tamaani ilinniartitsisut peqatigalugit atuarfiusuni ilinniartitsineq pisarluni. Ilinniagassani kalaallisut, danskisut, tuluttut aamma matematikkimi meeqqat atuarfianni 10. klassimi ingerlanneqartartup inissisisimaffigisaani ilinniartut ilinniartitaasarput, ingerlatallu naanerata kingornatigut ilinniagassani taakkunani misilitsinneqassapput. Tamakku saniatigut ilinniartut inuttut ineriartornermik ilinniartitaasarput, aammalu ilinniarnermut ilitsersorneqartarlutik.

2020-mut sulisoqarfimmut nalunaarusiaq Naalakkersuisut saqqummerseqqammerpaat, tassanilu iliuuserisat pilersitallu assigiinngitsut pillugit paasissutissat nassuiarneqarput. Saqqummersitaq uani nassaassaavoq.

Erseqqinnerusumik paasissutissat pillugit naalakkersuisumut allatsit Naja Lynge Petersen e-mailikkut attavigineqarsinnaavoq: nlyp@nanoq.gl imaluunniit oqarasuaatikkut + 299 34 56 11