Nunat Avannarliit Killiit Ulluat – Pinngortitarput kinaassuserpullu ukkataralugit

Pinngortitaq kinaassuserpullu. Piniarneq inooriaasitut, oqaluttuarluni saqqummiineq erinarsornerlu.
Tamakkuupput ukioq manna “Nunat Avannarliit Killiit Ulluanni” Katuami malinnaaffigineqarsinnaasut. “Nunat Avannarliit Killiit Ulluat” sisamanngorpat septembarip 23-ani 2021 Katuami malunnartinneqassaaq.

Pilersaarut ukioq manna marlunnut avinneqarpoq. Ilinniartitsisunut ualikkut ataatsimeersuartitsisoqassaaq qulequtaralugu: “Uagut tassa Nunat Avannarliit Killiit”. Pinngortitarput kinaassuserpullu unnukkut pilersaarummi sammineqassapput, tamanullu pisussaq ammasuussaaq.

Saniatigut Namminersorlutik Oqartussat ulloq malunnartinniarlugu Nunat Avannarliit Killiit erfalasuinik erfalasuliissapput.

“Nunat Avannarliit Killiit Ulluat” Nunani Avannarlerni Piorsarsimassutsikkut Attaveqaatip (NAPA-p) pilersaarusiorpaa.

“Nunat Avannarliit Killiit Ulluat”-a tunngavia:
”Savalimmiut, Kalaallit Nunaata Islandillu akornanni kulturikkut suleqatigiinnissamut isumaqatigiissut” 1. november 2017-imeersoq naapertorlugu nunani tamani ”Nunat Avannarliit Killiit Ulluat” ukiut tamaasa ingerlanneqartalissaaq. ”Nunat Avannarliit Killiit Ulluat” tassaavoq ukialeqqaarfik Nunani Avannarlerni Killerni oqaluttuarisaanerup kulturillu malunnartinneqarnissaat pillugit toqqarneqarsimasoq, tassunga ilanngullugu nunat akornanni suleqatigiinnerup annertusarnissaa ataatsimooqatigiittutullu misiginissaq.

”Nunat Avannarliit Killiit Ulluat” Nunani Avannarlerni Killerni Siunnersuisoqatigiit kaammattuutaannit nr. 4/2008-meersumit kingornatigullu aaqqissuunneqarsimasumit aallaaveqarpoq.

Maluginiaqqusaq
Oqartussat Covid-19 akiorniarlugu maleruaqqusaat malillugit inuit 12-ileereersimasut Katuamiinniarunik aappassaanneerlutik akiuussutissamik kapitereersimasussaapput imaluunniit annerpaamik akunnernik 48-nik pisoqaassusilimmik Covid-19-imik tunillatsissimannginnermut uppernarsaammik takutitsissapput. Tamanna Katuap iluani Katuallu silataani issiaffissani atuulluni. Maleruaqqusat septembarip 30-ata tungaanut atuutissapput.

Annertunerusumik paasisaqarusunnermi saaffigineqarsinnaavoq, Naalakkersuisumut allatsi Paninnguaq Steenholdt, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik, Toqq.: +299 34 5702, PSLT@nanoq.gl