Aasianni, Sisimiuni Upernavimmilu killilersuinerit nutaat

Maanna nunatsinni illoqarfiit pingasut Corona peqqutigalugu immikkut ittumik killilersuiffigineqalerput. Pineqartut tassaapput Aasiaat, Sisimiut aamma Upernavik taassumalu nunaqarfii. Aasianni Upernavimmilu aammalu taassuma nunaqarfii sapaatit akunnerata matuma siuliani killilersuiffigineqareerput, maannalu maleruagassat Sisimiunut nutaajupput.

Tamatuma peqatigisaanik katerinnernut maleruagassat Aasiannut Upernavimmullu, taassumalu nunaqarfiinut sukannernerulersinneqarput.

Illoqarfinnut pingasuusunut maleruagassat immikkut ittumik atuuttut:

• Pisortat assartuussissutaanut ilaassaguit tamakkiisumik kapitissimassaatit, imaluunniit coronamut misissortissimanermut uppernarsaammik, nal. 48-t inorlugit pisoqaassusilimmik takutitsisinnaassallutit. Taamaallaat marloriarlutit akiuussutissamik kapitissimaguit, imaluunniit ullut unnuallu marluk kingulliit ingerlanerini tunillatsissimannginnermut uppernarsaammik takutitsisinnaaguit bussinut, timmisartumut imaluunniit angallammut attartukkamut ilaasinnaavutit. Inuit illoqarfigisaminnut angalasut ilinniartulluunniit ilinniarfissaminnut angalasut uani ilaatinneqanngillat. Ilinniartut toqqaannartumik attavigineqarumaarput. Ilinniartut apeqqutissaqarunik ilinniarfimminnut saaffiginnissapput.
• Sarfaq Ittummi angalasinnaasut tassaapput tamakkiisumik kapitissimasut. Immikkut angalanissamut akuersisoqarsinnaanngilaq.
• Tamakkiisumik kapitissimanngitsut, sumiiffinnit pingasuusunit aallartussat tamarmik, Kalaallit Nunaanni sumiiffimmut allamut tikinnerminni ulluni tallimani mattusimassapput.
• Katerinnerni inuit 20-t sinnerlugit amerlassuseqarnissaat inerteqqutaavoq. Tassalu sumiiffinni tamanit orninneqartartuni inuit 20-t sinnerlugit amerlassusillit naapeqqusaanngillat.
• Sumiiffinni tamanit orninneqartartuni tamani, soorlu napparsimmavinni, pisiniarfinni, kommunit allaffiini angallassissutinilu tamanit atugaasuni qanermut assiaqut atorneqassaaq. Inuusuttut 18-it inorlugit ukiullit pineqanngillat.

Maleruagassanut nutaanut inuit 14-it, ippassaq Covid-19-imik tunillatsissimasutut paasineqartut tunngavigineqarput. Taakku tamarmik illoqarfinni pingasuusuni tunillatsissimapput.

Killilersuinerit nutaat 24. aggusti 2021-p tungaanut atuukkallassapput.