1.juuli 2021-miit ilaasut amerlissapput, Kangia ammaqqinnerussaaq tamakkiisumillu akiuussuserneqarsimasut mattusimagallassanngillat
Nassiussisuuvoq: Peqqissutsimut Naalakkersuisoqarfik![Air Greenland timmisartoq](/-/media/billeder/trafik/airgreenland_1.jpg?cx=0.5&cy=0.5&cw=975&ch=415&hash=7F7F2EC4469E87BB099693EF8AA24DA1)
Tuniluunnersuup nalaani Kalaallit inuiaqatigiit nunarsuarmi inuiaqatigiit akornanni ikinnerpaamik killilersuinikuupput sapinngisamillu minnerpaamik inuiaqatigiinni pingaarutilimmik suliassaqarfinnut akornusiisimalluni. Avataaniit tikinnermiit killilersuisimanerup attatiinnarneqarsimaneranik tamanna annerpaamik pissutigineqarpoq. Juulip aallaqqaataanniit maleruagassat qasukkartinneqassapput, taamaasilluni pisortaqarfiit pisariaqartitaat angalasussallu billetsinik pisariaqartitsinerat matussuserneqassapput.
Ilaasussat pisortaqarfiillu inissaat amerlineqarput
Sisamanngorneq 1. juuli aallarnerfigalugu sapaatip akunneranut sisamariarluni 250-illu tungaanut ilaasoqarluni timmisartuussisoqalissaaq. Taamaasilluni Kastrupimiit sapaatip akunneranut 1.000-it tikissinnaalissapput. Angalanermi ataatsimi inissat 27-vit pisortaqarfinnut inniminnerneqartassapput, tassani ilaapput napparsimasut, peqqinnissakkut sulisut aamma ilinniartut. Taassuma saniatigut Islandimiit sapaatip akunneranut angalanerit marluk tamarmik immikkut 30-nik ilaasoqarsinnaasut ammaavigineqassapput.
Tikittunut tamanut tikinnissamut annerpaamik akunnerit 72 iluanni coronamut misissortissimanermut uppernarsaasoqassaaq aamma sumut-immersuiffissaq immersorneqarsimassaaq.
Tamakkiisumik akiuussuserneqarsimasut mattusimagallassanngillat
Tamakkiisumik akiuussuserneqarsimagaanni nunatsinnut tikinnermi mattusimagallarnissaq pisariaaruppoq aamma misiliummik tigusiffineqaqqittarianngilaq.
Kangia ammarneqassaaq
Kangia ammaqqinnerani illoqarfimmut tikiffigisassaq toqqaannaq tikinneqarsinnaalerpoq, tassanilu , tamakkiisumik akiuussuserneqarsimanngikkaanni ullut tallimat angerlarsimaffimmi mattusimagallartoqarsinnaalerpoq illoqarfimmilu misiliummik tigusiffigineqarsinnaalerpoq. Tamakkiisumik akiuussuserneqarsimagaanni mattusimagallarnissaq miliummillu tigusiffineqarnissaq pisariaqanngillat.
Nordlandairip nalinginnaasumik Nerlerit Inaannut angalasarnera sullissinissamut isumaqatigiissut malillugu aallarteqqissaaq.
Tunillaassuunnertaqanngitsumik periusissiaq
Inuiaqatigiit akornanni suli tuniluuttoqannginnissaanik attassiniarnermik killilersuutit tunngavigivaat. Nunarsuaq tamakkerlugu coronavirusip allannguutaata deltap suli amerlanernik tuniluutileruttorpoq. Taamaattumik tikinnermi qanermut assiaqusersuineq killilersuutini ingerlatiinnarneqassapput.
1.septembari 2021 tungaanut
Aalajangersakkat nutaat corona allattoqarfianiit innersuussutigineqartut tunngavigivaat partiillu siuttuisa isumaqatigiillutik taakku akuersissutigineqarput. Aalajangersakkat nutaat 1. juulimiit 1. septembari 2021 tungaanut atuukkallassapput.
Coronamut tunngatillugu apeqqutissallit corona Hhotline oqa. nr. 801100 imaluunniit e-mail corona@nanoq.gl aqqutigalugit attaveqartassapput.
Tusagassiutinut nalunaarut pillugu apeqqutissallit Kirsten Nystrup, kirn@nanoq.gl imaluunniit oqarasuaat 34 66 90 / 28 66 90 aqqutigalugit pissarsiarineqarsinnaapput.