AtuartigukKalaallit Nunaanni akiuussutissat Moderna-meersut aamma Pfizer-BioNTech-imeersut atorlugit kapuisoqarpoq
Nassiussisuuvoq: Peqqissutsimut Naalakkersuisoqarfik
- Akiuussutissallu taakku taqqanik milittoortitsisinnaanerinik pasitsaassisoqanngilaqPiffissami kingullermi Danmarkimi sumiiffinnilu allani innuttaasut ikittut Covid-19-imut akiuussutissanik kapitereernerminni taqqamikkut milittuungaatsiartartut eqqartorneqarpoq. Tassanilu innuttaasut nakorsaasiorfimmit AstraZeneca-mit Covid-19-imut akiuussutissanik kapitissimasut pineqarput. Akiuussutissaq taanna Kalaallit Nunaanni atorneqarnikuunngilaq.
Akiuussutissat Moderna-meersut aamma Pfizer-BioNTech-imeersut nakorsaasiorfimmit AstraZeneca-mit pissarsiarineqartuniit allaanerujussuupput. Akiuussutissat AstraZeneca-meersut teknologii, akiuussutissanit taaneqartunit marluusunit atorneqartumiit, allaanerulluinnartoq atorlugu sanaajupput.
Akiuussutissat Moderna-meersut aamma Pfizer-BioNTech-imeersut akiuussutissaapput RNA-nik sanaajusut. Akiuussutissat marluk taakku inunnut millionilippassuarnut kingunerluuteqanngitsumik atorneqareerput. Taamaallaat akiuussutissat AstraZeneca-meersut atorneqarneri taqqanik milittoornernik malussarfigineqarsimapput.
Kalaallit Nunaanni amerlanerpaat akiuussutissanik kapitinnissaat pingaaruteqartorujussuuvoq. Akiuussutissat Covid-19-imik napparsimarujussualernissamut toqussuteqarnissamullu illersuutaapput. Tamatuma peqatigisaanik tuniluunnerup nunatsinnut pinerani, tamannami saneqqunneqarsinnaanngitsutut isigineqartariaqarmat, aseruisussamik tuniluuttoqalernissaata pinngitsoortinnissaanut aqqutissatuaavoq. Akiuussutissat assigiinngitsut marluk, Moderna-meersut aamma Pfizer-BioNTech-imeersut atukkagut niaqorlutsitsisinnaapput, nukinnik anniartitsisinnaapput/iluaalliortitsisinnaapput aammalu kapitiffik pullassinnaavoq, qasoqqatitsisinnaapput, qiiarujutsitsisinnaapput kissarneqartitsisinnaallutillu, taakkuli pilertortumik qaangiuttarput.
Kalaallit Nunaanniittut tamarmik Covid-19-imut akiuussutissanik kapitinnissamut neqeroorfigineqarunik akuerseqqullugit kaammattorneqarput – imminut inuiaqatigiillu eqqarsaatigalugit.