Kalaallit Nunaanni sullivinni avatangiisit pillugit ilinniartitaanerit tamanit peqataaffigisassat pillugit nalunaarummut missingiut

Nalunaarut allannguutinik imaqarpoq, ilaatigut sullivinni avatangiisit pillugit ilinniartitaanerit ingerlanneqarnerannut atatillugu annerusumik allanngorarsinnaanermik siunertaqartunik.

Allannguutit kinguneratut:

• Sullivinni avatangiisit pillugit sinniisuutitat aamma sulisunik siulersuisut sullivinni avatangiisit pillugit kattuffimmi ilaasortat sullivinni avatangiisit pillugit ilinniartinneqarnerat 37 tiiminit 22 tiiminut sivikillineqassaaq. Tamanna danskit sullivinni avatangiisit pillugit ilinniartinneqarnerannut assinguvoq.
• Sullivinni avatangiisit pillugit ilinniartitaanerit tamanit peqataaffigisassat tamarmik internetikkut atuartitsissutigineqarnissaat periarfissaassaaq. Ilinniartitsinissamik neqerooruteqartartut namminneq aalajangertassavaat, qanoq annertutigisumik ilinniartitaaneq internetikkut atuartitsinermik tunngaveqassanersoq. Danmarkimi aammattaaq periarfissaqarpoq, ilinniartitsinissamik neqerooruteqartartut interneti atorlugu tamakkerlugu imaluunniit ilaannakuusumik ilinniartitaanerit ingerlannissaannut akuerineqarnissaannut. Interneti atorlugu tamakkerlugu ilinniartitaanerit misileraanerupput, ulloq 1. april 2026-p tungaanut ingerlanneqartut.
• Pikkorissarnermut peqataasut sullivinni avatangiisit pillugit ilinniartitaanerni tamanit peqataaffigisassani suliaqarluni suliassaq ingerlatissavaat, tassani suliassami pikkorissarnerup imai, pikkorissarnermut peqataasut ataasiakkaat suliaannut kattunneqassapput. Kalaallit Nunaanni sullivinni avatangiisit pillugit ilinniartitaanernut tamanit peqataaffigisassanut tamanut taanna suliaqarluni suliassaq Danmarkimi najuulluni ilinniartitaanernut suliassamut assinguvoq.
• Illuliortiternermi sanaartornermilu isumannaatsuunissaq peqqissuunissarlu pillugit sulianut ataqatigiissaarisunik sullivinni avatangiisit pillugit ilinniartitaanermut ilinniartitsissutissatut pilersaarutip imaanut minnerpaamik piumasaqaat pillugu ilanngussaq ilanngunneqarpoq. Ilanngussaq ilinniartitsissutissatut pilersaarutip qanoq ilusilersorneqarnissaanut ilitsersuutitut ikiuutissatullu atuuppoq. Tamanna danskit suliaqarfimmut malittarisassaannut annertunerusumik assinguvoq, kisianni kalaallit malittarisassaannut
  tulluarsarneqarsimalluni.

Kalaallit Nunaanni sullivinni avatangiisit pillugit ilinniartitaanerit tamanit peqataaffigisassat pillugit nalunaarummut missingiummut oqaaseqaataasinnaasut e-mailikkut nassiuteqquneqarput uunga at@at.dk imaluunniit nnv@at.dk kingusinnerpaamik ulloq 31. oktober 2025.

Tusarniaanermut atatillugu tusarniaanermut akissutit, Sullivinnik Nakkutilliisoqarfiup tigusimasai, Tusarniaassutinut isaaffikkut tamanut tusagassiarineqarumaarput. Tusarniaanermut akissuteqarnermi peqatigitillugu tusarniaanermut akissutip tamanut tusagassiarineqarnissaa akuersaarneqartarpoq, matumani nassiussisut atia mailialu ilanngullugit.

Naatsorsuutigineqarpoq nalunaarut ulloq 1. januar 2026 atuutilersinneqassasoq.