Tamanut ammasumik tusarniutigineqarnera Uunga siunnersuutip: Pigisanik aalaakkaasunik piginnaatitaaffimmik pisisarneq imaluunniit atuisinnaatitaaneq pillugu Inatsisartut inatsisaat
Matumuuna tamanut ammasumik tusarniutigineqarpoq uunga siunnersuut: Pigisanik aalaakkaasunik piginnaatitaaffimmik pisisarneq imaluunniit atuisinnaatitaaneq pillugu Inatsisartut inatsisaat.
Pisisoq danskisut innuttaassuseqartinnagu, imaluunniit pisisoq suliffeqarfiuppat, suliffeqarfinnit danskisut innuttaassuseqartunit tamakkiisumik pigineqanngitsoq nakkutigineqanngitsorluunniit Kalaallit Nunaanni pigisamik aalaakkaasumik pisinissamut aamma nunaminertamik atuisinnaatitaaffimmik pissarsinissamut maleruagassiuussinissamut nakkutilliinissamullu tunngaviliinissaq siunnersuummi siunertarineqarpoq.
Inatsisissatut siunnersuummi matumani 2025-mut Ilassutitut aningaasaliissutinut inatsimmi, suliassaqarfimmut 70-72-mut, Ineqarnermut Attaveqaasersuutinullu Naalakkersuisoqarfik, oqaasertaliussaq nr. 4-mi erseqqissaanerit aalajangersimasut ingerlateqqinneqarput. Oqaasertaliussaq Inatsisartut Aningaasaqarnermut Akileraartarnermullu Ataatsimiititaliaanit ulloq 31. januar 2025 ataatsimiinnermi akuerineqarpoq. Siunnersuummi matumani aammattaaq nunanit allamiut Kalaallit Nunaanni pigisanut aalaakkaasunut atuisinnaatitaanermik pissarsisinnaanerat pineqartunut ilaatinneqarpoq.
Siunnersuummi ilaatigut Kalaallit Nunaat ataatsimut isigalugu imaluunniit illoqarfinni nunaqarfinniluunniit aalajangersimasuni pigisanut aalaakkaasunut piginnaatitaanermik pisinermi imaluunniit atuisinnaatitaalernermi, avataaniit annertuunik aningaasaliissutaasunit Kalaallit Nunaanni pigisanut aalaakkaasunut akinik aalajangersaasarnerup neqerooruteqartitsisarnerullu nikitsinneqannginnissaanut tapersiinissaq siunertarineqarpoq. Assersuutigalugu nunanit allaniit inissianik imaluunniit illunik inuussutissarsiorfiusunik pioreersunik pisisoqarneranit akinik aalajangersaasarneq neqerooruteqartitsisarnerlu sunniuteqarfigineqarsinnaapput, taamaalillunilu innuttaasut maani najugaqartut inissianik imminnut pilersorsinnaanerinut aammalu suliffeqarfinnik inuussutissarsiorfiusunik pilersitsisinnaanerinut killiliisinnaallutik akitsorsaataasinnaallutillu.
Kalaallit pigisanik aalaakkaasunik, taakkununngalu pigisat aalaakkaasut najugaqarfittut atorneqartut ilanngullugit, niueruteqarneranni niuerfik aammalu aningaasalersuinermut periarfissat pioreersut, aningaasaqarnerup annertussusaa kiisalu Kalaallit Nunaanni aningaasarsiat qaffasissusaat tunngavigalugit akinik aalajangersaasarneq neqerooruteqartitsisarnerlu annikitsunnguupput.
Avataaniit pigisanik aalaakkaasunik, nalinginnaasumik Kalaallit Nunaanni aningaasalersuinermi atorneqartartut avaqqullugit pisisoqartalernissaa pigisanik aalaakkaasunik niueruteqarnermi oqimaaqatigiiffiusunik pioreersumik nikisitsinissamut annertuumik uloriarnartorsiortitsisussaavoq, aammalu akit aalajangersarneqartarnerinik neqerooruteqartitsisarnermillu, inuiaqatigiit pigisanik aalaakkaasunik pigisaqarnissamut attartornissamullu periarfissaannut naapertuutinngitsunik pilersitsiviussalluni.
Inuit danskisut innuttaassuseqartut, aammalu ingerlatseqatigiiffiit aningaasaliiffiusut taakkunannga 100 %-inik pigineqartut, Kalaallit Nunaanni pigisanut aalaakkaasunut piginnaatitaanermik killilersuiffiunngitsumik pisisinnaassasut imaluunniit atuisinnaatitaaffeqalersinnaassasut, imaluunniit Kalaallit Nunaanni nunaminertanik atuisinnaatitaassasut siunnersuutigineqarpoq.
Siunnersuutigineqarpoq, inuit danskisut innuttaassuseqanngitsut, aammalu ingerlatseqatigiiffiit aningaasaliiffiusut taakkunannga 100 %-inik pigineqartut Kalaallit Nunaanni pigisanut aalaakkaasuut piginnaatitaanermik pisisinnaassasut imaluunniit atuisinnaatitaalersinnaassasut, imaluunniit Kalaallit Nunaanni nunaminertanik atuisinnaassasut inuk,
1) Kalaallit Nunaanni aalajangersimasumik najugaqarpat aamma inuit nalunaarsorsimaffianni nalunaarsorneqarsimappat, tamannalu ukiut siuliini marlunni amerlanerusuniluunniit pisimappat, aamma
2) Kalaallit Nunaannut tamakkiisumik akilersaarsinnaatitaappat, aammalu ukiut siuliini marlunni amerlanerusuniluunniit Kalaallit Nunaannut tamakkiisumik akileraartussaatitaasimappat.
Siunnersuutigineqarpoq suliffeqarfiit aningaasalersuisartut, kreditinstitut-it aamma sillimmasiisarfiit, ilanngullugillu inuunermut sillimasiisarfiit kiisalu soraarnerussutisiassanut aningaasaateqarfiit Danmarkimi, Savalimmiuni imaluunniit Kalaallit Nunaanni angerlarsimaffeqartut aammalu Finanstilsyn-imit imaluunniit Tryggingareftirlitið-imit nakkutigineqartussaatitaasut Kalaallit Nunaanni pigisamut nalilimmut piginnaatitaalersinnaasut imaluunniit Kalaallit Nunaanni nunaminertamut atuisinnaatitaalersinnaasut.
Taamaalilluni aningaaseriviit realkredit-imillu taarsigassarsiniartarfiit Kalaallit Nunaanni pigisanik aalaakkaasunik niueruteqarnermut akuusutut ilaasinnaalernissaat, aammalu Kalaallit Nunaanni pigisanut aalaakkaasunut akinik pilersitsisarnerup neqerooruteqartitsisarnerullu patajaatsumik eqqoriaruminartumillu ingerlatiinnarneqarnissaannut iluaqutaasinnaanissaat pingaartinneqarpoq. Aammattaaq aningaasaqarnikkut sullissiviit taaneqartut, Aningaasaqarnermut ministereqarfimmit aamma Tryggingareftirlitið-imit nakkutigineqarnissaat pingaartinneqarpoq.
Taamatuttaaq Namminersorlutik Oqartussat kalaallit pigisanik aalaakkaasunik niuerfiannut tunngatillugu aningaaserivinnik, realkredit-imik taarsigassarsiniartarfinnik aamma aningaasaliisarnernut nakkutilliisunik pisortatigoortumik suleqateqarnissaat pingaartinneqarpoq. Kiisalu Namminersorlutik Oqartussat pensioninik katersuiviit suleqatigalugit pensioninik katersuiviit Kalaallit Nunaanni pigisanut aalaakkaasunut aningaasaliisarnissamut periarfissanik sinaakkutissanillu misissuinissaat pingaartinneqarpoq.
Inatsimmi siunertaasoq eqqarsaatigalugu Kalaallit Nunaanni pigisanut aalaakkaasunut piginnaatitaanermik pisisinnaatitaanerup imaluunniit atuisinnaatitaanerup ilaqutariit akornanni kingornussinikkut, pigisanik avitsinikkut tunissuteqarnikkulluunniit killilerneqarnissaa tunngavissaqartutut isigineqanngilaq.
Tamatuma saniatigut Kalaallit Nunaanni pigisanut aalaakkaasunut piginnaatitaanermik pisinissami imaluunniit atuisinnaatitaalernissami, imaluunniit Kalaallit Nunaanni nunaminertamik atuisinnaatitaanissami Naalakkersuisut allakkatigut akuersissuteqarnissaat piumasarineqarpoq. Siunnersuummi Naalakkersuisut qanoq ilinerani Kalaallit Nunaanni pigisamut aalaakkaasumut piginnaatitaanermik pisinissamut imaluunniit atuisinnaatitaalernissamut, imaluunniit Kalaallit Nunaanni nunaminertamik atuisinnaatitaanissamut akuerineqarnissamik qinnuteqaatinut itigartitsisinnaanersut itigartitsinermiluunniit nalunaaruteqarsinnaanersut, imaluunniit akuersisinnaanersut maleruagassiuunneqanngilaq.
Siunersuutip tunuliaqutaa, siunertaa, imarisaalu annertunerusumik
paasisaqarfiginissaannut, siunnersuummut nassuiaatit ilanngullugit
nassiunneqartut innersuussutigineqarput.
Oqaaseqaataasinnaasut Ineqarnermut Attaveqasersuutinut Isorliunerusunullu
Naalakkersuisoqarfimmut kingusinnerpaamik 3. Juli 2025, nal. 12
nassiunneqarsimaqquneqarput. Oqaaseqaatit naalakkersuisoqarfiup
pisortatigoortumik mailadressianut box909@nanoq.gl-imut kiisalu CC-erlugu stsa@nanoq.gl