’Illuliortiternermik sanaartornermillu inuussutissarsiutilinni piujuartitsinissamut nunami namminermi periusissiaq’ tamanut ammasumik tusarniaassutigineqarluni tusarniaanermi iserfissiamut ivertinneqarpoq
Saqqummiunneqarpoq: 13. juuni 2024
Tusarniaanermi killigititaq: aggustip 27-ani 2024 nal. 10.00
Naalakkersuisoqarfik: Ineqarnermut Attaveqaasersuutinullu Naalakkersuisoqarfik
Tusarniaanermi akissutit nassiunneqassappput: box909@nanoq.gl, CC. nmsa@nanoq.gl
’Illuliortiternermik sanaartornermillu inuussutissarsiutilinni piujuartitsinissamut nunami namminermi periusissiaq’ tamanut ammasumik tusarniaassutigineqarluni Naalakkersuisut tusarniaanernut iserfissiaannut ivertinneqarpoq. Tusarniaanermi akissuteqaatit Ineqarnermut Attaveqaasersuutinullu Naalakkersuisoqarfimmut – box909@nanoq.gl – nassiuteqquneqarpoq, nmsa@nanoq.gl CC-mut ikkullugu. Tusarniaanermi aggustip 27-ani nal. 10 killigitinneqarpoq.
Naalakkersuisoqarfimmiit sullissisut suleqatillu tamarmik kaammattorneqarput, periusissiamut oqaaseqaatinik allannguutissatullu siunnersuutinik nassiusseqqullugit.
Periusissiami suliassaqarfimmi suup tungaanut ingerlatsisoqassanersoq, aammalu qanoq iliorluni piujuartitsiffiunerusumik ineriartortitsisoqassanersoq pillugu suliassaqartunik oqaloqateqarnerup aallartinneqarnissaa tapersersuinissarlu siunertarineqarpoq. Aallaqqaataaniit inatsisinik nutaanik imaluunniit piumasaqaatinik nutaanik, suliassaqarfimmi sulinermik ajornarnerulersitsisussanik atuutsitsilernissaq siunertaanngilaq.
Periusissiami nunatsinni illuliortiternermik sanaartornermillu inuussutissarsiuteqartut piujuartitsinermik paasinninnerulernissaannut siunnersuutinik, kiisalu suliniutissanik arlalinnik, piujuartitsiffiusumik ineriartortitsinissamut siullertut alloriarfiusussanut siunnersuutinik saqqummiussiffiuvoq. Periusissiami ataatsimut tunngavissanik, suliaqartut ataatsimoorlutik ineriartortissinnaasaannik pilersitsinissaq anguniarneqarpoq. Tamatuma peqatigisaanik periusissiaq inuussutissarsiuteqartut unammillersinnaassuseqarnerinut pitsanngueqataassaaq, nunatsinni ineriartornermut naammassinneqataaffiussaaq, kiisalu nunatsinni sumiiffinni pissutsit aallaavigalugit piujuartitsiffiusumik ineriartortitsinissamut iluaqutaassalluni.